جھارکھنڈ: مغربی بنگال میں بھارتی اداکارہ ریا کماری کو لٹیروں نے گولی مار کر قتل کر دیا۔
بھارتی میڈیا کے مطابق بدھ کے روز مغربی بنگال کے ہاوڑہ ضلع میں ہائی وے ڈکیتی کی کوشش کے دوران اداکارہ ریا کماری کو گولی لگ گئی، جو ان کے لیے مہلک ثابت ہو گئی۔
ریا کماری کا تعلق ریاست جھارکنڈ سے تھا، پولیس حکام کے مطابق وہ اپنے شوہر فلم پروڈیوسر پرکاش کمار، اور دو سالہ بیٹی کے ساتھ کار میں نیشنل ہائی وے 16 کے ذریعے کولکتہ جا رہی تھیں۔
پولیس رپورٹ کے مطابق پرکاش کمار نے صبح تقریباً چھ بجے بگنان پولیس اسٹیشن کی حدود میں واقع مہیشریکھا کے علاقے میں پیٹرول بھرنے کے لیے گاڑی روکی تھی، اس کے فوراً بعد ان پر تین آدمیوں کے ایک گروپ نے حملہ کر دیا، جو انھیں لوٹنے کی کوشش کر رہے تھے۔
شردھا قتل کیس سے ڈر کر ’بریک اپ‘ کیا، خودکشی کرنے والی بھارتی اداکارہ کے دوست کا انکشاف
ریا کماری نے اپنے شوہر کو بچانے کی کوشش کی تو ایک لٹیرے نے ان پر گولی چلا دی، اور پھر فرار ہو گئے۔
پولیس رپورٹ کے مطابق پرکاش کمار نے بیوی کی جان بچانے کے لیے انھیں کار میں ڈالا اور تین کلومیٹر تک سفر کے بعد ہائی وے پر کچھ لوگوں کو دیکھ کر مدد طلب کی، جس پر وہ ریا کماری کو اولوبیریا کے ایس سی سی میڈیکل کالج، اسپتال لے گئے، لیکن ڈاکٹروں نے انھیں مردہ قرار دے دیا۔
پولیس کا کہنا تھا کہ واقعے کی تحقیقات کی جا رہی ہے، متاثرہ فیملی کی گاڑی کا فرانزک بھی کیا جائے گا۔
