کابل: افغان سیکیورٹی فورسز نے افغان صوبے فراہ میں آپریشن کرتے ہوئے 16 طالبان جنگجوؤں کا ہلاک کردیا۔
تفصیلات کے مطابق طالبان کی جانب سے فراہ میں قائم سیکیورٹی چیک پوسٹ پر حملہ کیا گیا، ردعمل عمل میں افغان فورسز نے علاقے میں آپریشن کرتے ہوئے سولہ شدت پسندوں کا ہلاک کردیا۔
غیر ملکی خبر رساں ادارے کا کہنا ہے کہ اس آپریشن کے دوران ایک افغان فوجی بھی ہلاک ہوا، جبکہ علاقے کا مکمل طور پر کنٹرول سنبھال لیا گیا ہے۔
البتہ طالبان کی جانب سے چیک پوسٹ پر حملے کی ذمہ داری قبول نہیں کی گئی، جبکہ افغان فوج کے ہاتھوں 16 جنگجوؤں کی ہلاکت کو بھی مسترد کردیا۔
یہ حملہ ایک ایسے وقت میں کیا گیا ہے کہ جب امریکا اور افغان طالبان کے درمیان مذاکرات کا سلسلہ بھی جاری ہے۔
غیر ملکی میڈیا نے دعویٰ کیا ہے کہ فراہ طالبان کے لیے ایک اہم علاقہ ہے کیونکہ اسے سمگلر افیون کی سمگلنگ کے لیے استعمال کرتے ہیں، طالبان نے مذکورہ صوبہ پر قبضہ گذشتہ سال مئی میں کیا۔
بغلان: طالبان کا بارود سے بھری گاڑی سے پولیس ہیڈکوارٹر پر حملہ، 13 ہلاک
خیال رہے کہ رواں ماہ کے آغاز میں افغانستان کے شمالی صوبے بغلان کے شہر پل خمری میں طالبان نے پولیس ہیڈ کوارٹر پر بارود سے بھری گاڑی کے ساتھ حملہ کیا تھا، جس میں 13 سیکورٹی اہل کار ہلاک ہو گئے تھے۔
