اسلام آباد: پاکستان میں موجود افغان حکومت کے قانونی دستاویزات رکھنے والا بھی دہشت گردی میں ملوث نکلا ہے۔
تفصیلات کے مطابق پاکستان میں امن و امان خراب کرنے والا افغان شہری نکلا، بنوں بکا خیل میں گزشتہ روز موٹر سائیکل بم دھماکے میں پھٹنے والا دہشت گرد رابن اللہ افغانستان کا شہری تھا۔
رپورٹ کے مطابق دہشت گرد تذکرے(افغانستان کا شناختی کارڈ) کی بنیاد پر پاکستان میں داخل ہوا، ہلاک دہشت گرد رابن اللہ کا تذکرہ نمبر 08916164 ہے۔
تفصیلات سامنے آنے کے بعد اب یہ سوال اٹھ رہے ہیں کہ افغان حکومت نے ٹی ٹی پی کے دہشت گرد کو قانونی دستاویز کیوں فراہم کیں؟ کیا پاکستان کو قانونی دستاویزات رکھنے والے افغانیوں کو بھی واپس بھیجنا پڑے گا؟
دوسری جانب تجزیہ کار کا کہنا ہے کہ افغان حکومت اپنے لیے ہی مشکلات پیدا کررہی ہے، اس سے پہلے بھی کئی دہشتگروں کی تصاویر افغان حکومت کے ساتھ شیئر کی گئی لیکن اس پر کوئی ایکشن نہیں لیا جارہا ہے۔
واضح رہے کہ بنوں کے علاقے بکا خیل میں خودکش بمبار نے خود کو دھماکے سے اڑالیا تھا، خودکش بمبار موٹر سائیکل پر سوار ہو کر سیکیورٹی فورسز کے قافلے سے ٹکرا گیا تھا۔
رپورٹ کے مطابق دھماکے کے نتیجے میں 2 بے گناہ شہری شہید، 10 زخمی ہوگئے تھے، زخمیوں میں 7 شہری اور 3 سیکیورٹی اہلکار شامل ہیں۔
