لاہور: صوبہ پنجاب میں غیر قانونی طور پر مقیم افغان پناہ گزینوں کی واپسی کا عمل تیز کرنے کا فیصلہ کیا گیا ہے، سنہ 2002 میں پنجاب آنے والے 30 ہزار افغانوں کی تعداد 20 سال میں 2 لاکھ سے تجاوز کر گئی۔
تفصیلات کے مطابق پنجاب حکومت نے افغان پناہ گزینوں کی وطن واپسی کا عمل تیز کرنے کا فیصلہ کیا ہے، پنجاب میں مقیم 2 لاکھ 75 ہزار سے زائد افغان باشندوں کا ریکارڈ طلب کرلیا گیا۔
سنہ 2002 میں 30 ہزار 911 افغان پنجاب میں آئے، گزشتہ سال 350 افغانوں کا اضافہ ہوا، 20 سال میں پنجاب میں افغانوں کی تعداد 2 لاکھ سے زیادہ ہوگئی۔
وزیر اعلیٰ پنجاب کو تجویز دی گئی ہے کہ غیر قانونی مقیم افغان پناہ گزینوں کی کھوج لگانے کے لیے گنتی کی جائے اور قانون نافذ کرنے والے اداروں سے سروے کروایا جائے۔
حکام کا کہنا ہے کہ غیر قانونی طور پر مقیم افغانوں کو ٹریک کرنے کے لیے میکنزم تشکیل دیا جائے۔
حکام کے مطابق افغان باشندوں کی رضا کارانہ واپسی کے لیے نئی مہم چلانے کی ضرورت ہے، افغان پناہ گزینوں کی وطن واپسی تیز کرنے کا فیصلہ ایپکس کمیٹی کے اجلاس میں کیا گیا۔
