اسلام آباد: افغانستان میں پاکستانی شہری کی بدترین غیر انسانی سلوک کی وجہ سے ہلاکت کا انکشاف ہوا ہے۔
تفصیلات کے مطابق افغانستان میں پاکستانیوں کے ساتھ غیر انسانی سلوک کا ایک اور واقعہ پیش آیا ہے، مزار شریف جیل میں ایک پاکستانی شہری بدترین سلوک کے باعث جاں بحق ہو گیا۔
رپورٹس کے مطابق کوہاٹ کے رہائشی بہرام شاہ ولد سمندر خان افغانستان میں مزار شریف جیل میں قید تھے، افغان عبوری حکومت کی پولیس نے 4 مئی کو عبدالحامد نامی افغان شہری کی شکایت پر بہرام شاہ کو حراست میں لیا تھا۔
بہرام شاہ پر محض چند لاکھ روپے لین دین کی گارنٹی لینے اور رقم ادائیگی کرانے میں ناکامی کا الزام تھا، افغانستان میں جیل حکام کی رپورٹ میں بتایا گیا کہ بہرام شاہ دل کے عارضے میں مبتلا اور مزار شریف میں زیر علاج رہے۔
مزار شریف کے اسپتال میں دوران علاج ڈاکٹر نے انھیں کابل منتقل کرنے اور آپریشن کی تجویز دی تھی، ڈاکٹر نے رپورٹ میں بہرام شاہ کی صحت پر سنگین تحفظات کا اظہار کیا اورتجویز کیا تھا کہ فوری رہائی دی جائے، تاہم افغان جج نے بہرام شاہ کو دوسرا گارنٹر پیش کرنے پر رہائی دینے کا غیر انسانی اور غیر قانونی حکم دیا۔
واضح رہے کہ یہ پہلا موقع نہیں ہے جب افغان عبوری حکومت ایسے معاملے میں سنگین لاپرواہی سے کام لے رہی ہے، پہلے بھی 2 پاکستانی مزدوروں کو افغان شہری کی غیر قانونی حراست سے بازیاب کرایا گیا تھا۔
