کمنٹیٹر سائمن ڈول نے پاکستان کرکٹ ٹیم کے کپتان بابر اعظم کی بیٹنگ کے بعد بھارت کرکٹ ٹیم کے سابق کپتان ویرات کوہلی کی بیٹنگ پر بھی تنقید شروع کردی۔
انڈین پریمیئر لیگ میں رائل چیلنجر بنگلور اور لکھنؤ سپر جائنٹس کے درمیان کھیلے گئے میچ میں نیوزی لینڈ کے سابق ٹیسٹ فاسٹ بولر اور کمنٹیٹر سائمن ڈول نے ویرات کوہلی کی جانب سے سست بیٹنگ کرنے پر ناراضگی کا اظہار کیا۔
کمنٹری کے دوران سائمن ڈول نے ویرات کوہلی کی نصف سنچری کو تنقید کا نشانہ بناتے ہوئے کہا کہ کوہلی نے ٹیم کے لیے نہیں بلکہ ذاتی سنگ میل کے لیے رنز بنائے۔
سائمن نے کہا کہ کوہلی نے ٹرین کی طرح بیٹنگ کا آغاز کیا، بہت اچھے شاٹس کھیل رہے تھے لیکن 42 سے 50 رنز بنانے تک انہوں نے 10 گیندیں کھیلیں۔
مزید پڑھیں:
سائمن ڈول نے بابر اعظم کی سنچری پر کیا کہا؟
سائمن ڈول نے بابر کے بعد رضوان پر تنقید کردی
سائمن ڈول نے کوہلی کو بھی آڑے ہاتھوں لیتے ہوئے کہا کہ ٹی ٹوئنٹی فارمیٹ میں اب سنگ میل کی کوئی گنجائش نہیں رہی، جب آپ کے پاس وکٹیں موجود ہوں تو آپ کو تیز کھیلنا چاہیے۔
واضح رہے کہ اس سے قبل سائمن ڈول نے پاکستان کرکٹ ٹیم کے کپتان بابر اعظم کی بیٹنگ پر بھی تنقید کی تھی۔
انہوں نے کہا تھا کہ بابر کو سنچری کے وقت رن ریٹ کو کم کرنے کے بجائے باؤنڈریز تلاش کرنے پر توجہ دینی چاہیے تھی۔
Simon Doull's statement on Virat Kohli. Do you agree with him? #IPL2023pic.twitter.com/w6ogr2leQM
— Farid Khan (@_FaridKhan) April 10, 2023