رکی پونٹنگ کے بعد اینڈی فلاور نے بھی بھارت کی کوچنگ میں عدم دلچسپی کا اظہار کیا ہے۔
زمبابوے کے سابق کرکٹر اینڈی فلاور نے واضح کیا ہے کہ ان کا بھارتی کرکٹ ٹیم کے ہیڈ کوچ کے عہدے کے لیے درخواست دینے کا کوئی ارادہ نہیں ہے۔
آئی پی ایل پلے آف سے اپنی ٹیم کے باہر ہونے کے بعد، رائل چیلنجرز بنگلورو کے کوچ نے ایک پریس کانفرنس میں اپنے فیصلے کی تصدیق کی ہے۔
انہوں نے کہا کہ میں نے اپلائی نہیں کیا ہے میں اپلائی نہیں کروں گا میں اس وقت فرنچائز گیم میں اپنی شمولیت سے خوش ہوں کیونکہ یہ دلچسپ کام ہے، اور میں خوش قسمت ہوں کہ میں کچھ شاندار تنظیموں کے ساتھ تعاون کر رہا ہوں، جن سے میں اس وقت پوری طرح لطف اندوز ہو رہا ہوں۔
غور طلب ہے کہ بی سی سی آئی کی جانب سے درخواستوں کے لیے دعوت نامہ اس وقت آیا جب راہول ڈریوڈ کی میعاد جون میں T20 ورلڈ کپ کے بعد ختم ہونے والی ہے۔
سابق آسٹریلوی کپتان رکی پونٹنگ نے بھارتی کرکٹ ٹیم کی کوچنگ سے انکار کرنے سے متعلق لب کشائی کی۔ رکی پونٹنگ نے کہا کہ بھارتی ٹیم کے اگر آپ کوچ ہوں گے تو پھر آپ آئی پی ایل میں کوچنگ نہیں کرسکتے، نیشنل ٹیم کا کوچ ہونے کا مطلب سال میں 10، 11 ماہ کی نوکری ہے، انہوں نے کہا کہ میں گھر میں فیملی کے ساتھ وقت گزارنا چاہتا ہوں۔
انہوں نے کہا کہ فیملی کو بھارت میں کرکٹ کلچر اچھا لگتا ہے لیکن اس وقت کوچنگ میرے لائف اسٹائل میں فٹ نہیں ہوتی۔
