لندن: بھارتی فضائی کمپنی ایئر انڈیا کے طیارے میں بم کی اطلاع پر لندن میں ہنگامی لینڈنگ کی گئی۔
بھارتی میڈیا رپورٹس کے مطابق ایئر انڈیا طیارے کی امریکا جانے والی پرواز میں بم کی اطلاع پر لندن ایئرپورٹ پر اتار لیا گیا، ایئرانڈیا کی پرواز اے ون 191 ممبئی سے براہ راست امریکی شہر نیویارک جارہی تھی۔
ایئر انڈیا کے بوئنگ 777 طیارے میں یہ واقعہ صبح 10:30 بجے رونما جب پائلٹس نے برطانوی کنٹرول ٹاور کو بم کی اطلاع دی۔
طیارے کو دوران پرواز طیارے میں بم کی اطلاع ملی، پائلٹس نے برطانوی کنٹرول ٹاور کو اطلاع دی جس پر برطانوی فضائیہ کے دو لڑاکا طیاروں نے طیارے کو فضا میں ہی حفاظتی تحویل میں لیا۔
پائلٹس نے طیارے کا رخ موڑ کر اسے لندن کے ایئرپورٹ پر اتار لیا اور مسافروں کو سخت سیکیورٹی میں رن وے سے لاؤنج میں لے جایا گیا جس کے بعد طیارے کی تلاشی کا عمل جاری ہے۔
برطانوی پولیس نے ابھی تک طیارے کو کلیئر قرار نہیں دیا ان کا کہنا ہے کہ کلیئرنس میں مزید کچھ گھنٹے درکار ہیں۔
برطانوی پولیس کی جانب سے طیارے کی تلاشی کے عمل میں سراغ رساں کتوں کی مدد بھی لی جارہی ہے۔
ایک خاتون مسافر نروپن نناوتی کا کہنا تھا کہ میں اپنے بچوں کے ساتھ نیویارک جارہی ہوں، طیارے میں بم کی اطلاع پر ہم سب بہت خوفزدہ ہوگئے ہیں۔
چند گھنٹوں بعد طیارے میں بم کی اطلاع افواہ نکلی اور طیارے کو اپنی منزل کی جانب روانہ کردیا گیا۔
