وارانسی: بھوجپوری فلموں کی اداکارہ آکانکشا دوبے نے وارانسی کے ایک ہوٹل میں خود کشی کر لی۔
بھارتی میڈیا رپورٹس کے مطابق بھوجپوری اداکارہ آکانکشا دوبے نے اتوار کو وارانسی کے ایک ہوٹل کے کمرے میں مبینہ طور پر خودکشی کر لی ہے۔
25 سالہ آکانکشا سارناتھ علاقے میں اپنے ہوٹل کے کمرے میں لٹکی ہوئی پائی گئیں، پولیس نے ان کے اہل خانہ کو واقعے کی اطلاع دی، اگرچہ ابتدائی طور پر یہ خودکشی کا کیس لگتا ہے، تاہم پولیس اس معاملے کی تحقیقات کر رہی ہے۔
پولیس نے لاش قبضہ میں لے کر پوسٹ مارٹم کے لیے بھیج دی، جب کہ فرانزک ٹیم نے کمرے کا معائنہ کر کے شواہد اکٹھے کیے۔
آکانکشا یوپی کے بھدوہی ضلع کے علاقے پارسی پور کی رہنے والی تھیں، اور ممبئی میں رہائش پذیر تھیں، وہ شوٹنگ کے سلسلے میں وارانسی آئی ہوئی تھیں، میک اپ آرٹسٹ راہل شرما، ہیئر ڈریسر ریکھا موریا اور اسپاٹ بوائے سنجے یادو بھی ان کے ساتھ موجود تھے۔
رپورٹ کے مطابق اتوار کو صبح 10 بجے ایک بھوجپوری فلم کی شوٹنگ کے لیے سیٹ سے راہل کے فون پر کال آئی کہ ہیروئن کو لے کر آ جاؤ، راہل نے دروازے پر دستک دی اور بیل بجائی تو کوئی جواب نہیں ملا، اس پر راہل نے منیجر رتیش کمار مہتا کو مطلع کر دیا۔
رپورٹ کے مطابق رتیش نے انٹرکام سے کال کی، جب اداکارہ نے کال نہیں اٹھائی تو ماسٹر چابی سے کمرہ کھولا گیا، انھوں نے دیکھا کہ اداکارہ کی لاش دوپٹے کے ذریعے پنکھے سے لٹکی ہوئی تھی، ہوٹل کے منیجر نے پولیس کو اطلاع دے دی۔
آج اتوار ہی کو بھوجپوری سپر اسٹار پون سنگھ کے ساتھ ان کا نیا گانا ’آرا کبھی ہارا نہیں‘ ریلیز ہوا ہے۔
