اسمارٹ فونز نے جہاں ہماری زندگیوں میں بے شمار آسانیاں پیدا کردی ہیں، وہیں ایک الارم کا سنوز بٹن بھی ہے جو ہمیں ایک سہولت لگتا ہے۔
الارم کی آواز پر آنکھ کھلتے ہی ہم میں سے اکثر افراد سنوز کا بٹن دبا دیتے ہیں، اس سے الارم فوری طور پر خاموش ہوجاتا ہے اور دس یا پندرہ منٹ بعد دوبارہ بجتا ہے جس سے ہمیں پندرہ منٹ سونے کا مزید وقت مل جاتا ہے۔
تاہم ماہرین اس بٹن کو ایسی غلطی قرار دیتے ہیں جو ہمارا پورا دن برباد کرسکتی ہے۔
ماہرین کا کہنا ہے کہ اگر آپ الارم کے بجتے ہی اسے سنوز پر لگا کر دوبارہ سوجاتے ہیں اور 10 منٹ بعد الارم دوبارہ بج اٹھتا ہے، اور یہ سلسلہ آدھے گھنٹے تک جاری رہتا ہے تو جان لیں کہ آپ اپنی صحت کے ساتھ دشمنی کر رہے ہیں۔
ماہرین کے مطابق الارم کی پہلی گھنٹی پر اٹھ کر بستر پر بیٹھ جانا زیادہ مفید ہے۔ بار بار الارم بجنے سے نہ تو آپ ٹھیک سے سوپاتے ہیں اور نہ جاگ پاتے ہیں، یوں آپ کا دماغ تھکن کا شکار ہوجاتا ہے اور آپ سارا دن غنودگی محسوس کرتے رہیں گے۔
ماہرین کا کہنا ہے کہ اگر آپ خوشگوار اور چاک و چوبند دن گزارنا چاہتے ہیں تو اسی وقت کا الارم لگائیں جب آپ کو اٹھنا ہے، اور پہلی گھنٹی بجتے ہی فوراً اٹھ بیٹھیں، اس سے آپ کا جسم اور دماغ سارا دن فعال اور چاک و چوبند رہے گا۔
