گنگو بائی کاٹھیا واڑی کے لیے بہترین اداکارہ کا نیشنل ایوارڈ وصول کرنے والی عالیہ بھٹ نے اپنے شوہر کا سر بھی فخر سے بلند کردیا۔
بھارتی نیشنل فلم ایوارڈز کی تقریب کے موقع پر ان کے شوہر اور بالی وڈ کے نامور ایکٹر رنبیر کپور اپنی اہلیہ کی جانب سے ایوارڈ لینے کی فلم بندی کرتے رہے۔ بہترین اداکارہ کے لیے عالیہ کا نام پکارا گیا تو رنبیر نے اپنے موبائل فون میں ویڈیو بنا کر اُن خوبصورت لمحات کو قید کرلیا۔
بالی وڈ اداکارہ نے ایوارڈ وصول کرنے کے لیے دوبارہ سے اپنی شادی کی ساڑھی پہنی تھی جس سے ظاہر ہوتا ہے کہ یہ لمحہ ان کے کتنا خاص تھا۔
بھارتی میڈیا کے مطابق دہلی میں 69ویں نیشنل فلم ایوارڈز کی تقریب کا انعقاد کیا گیا تھا جس میں عالیہ بھٹ کو سنجے لیلا بھنسالی کی فلم ‘گنگو بائی کاٹھیاواڑی’ کے لیے بہترین اداکارہ کے ایوارڈ دیا گیا جبکہ ان کے ساتھ مشترکہ طور پر کریتی سینن کو بھی ایوارڈ سے نوازا گیا۔
کریتی سینن کو ان کی فلم ’میمی‘ جب کہ الو ارجن کو ’’پشپا : دی رائز‘ کی شاندار پرفارمنس پر بہترین اداکار کے اعزاز سے نوازا گیا۔
تامل انڈسٹری کی مشہور فلم ’آر آر آر‘ کو بیسٹ پاپولر فلم کا ایوارڈ ملا جبکہ شریا گھوشال کو بہترین خاتون پلے بیک سنگر کا ایوارڈ دیا گیا ہے۔
معروف اداکارپنکج ترپاٹھی کو بھی فلم ’میمی‘ کے بہترین اداکاری کرنے پر معاون اداکار کے نیشنل ایوارڈ سے نوازا گیا۔
