نئی دہلی : بھارت کی تنگ نظر مودی سرکار نے اپنے محسنوں اور اکابرین کو بھی نہ بخشا، علامہ اقبال ؒ کی تعلیمات پر مشتمل باب ونیورسٹی کے نصاب سے ہٹا دیا گیا۔
تفصیلات کے مطابق دہلی یونیورسٹی کی انتظامیہ نے’سارے جہاں سے اچھا، ہندوستاں ہمارا‘کے خالق ڈاکٹر علامہ محمد اقبالؒ کی تعلیمات پر مبنی باب کو یونیورسسٹی نصاب سے ختم کرنے کا فیصلہ کیا ہے۔
بھارتی میڈیا کے مطابق دہلی یونیورسٹی (ڈی یو) کی اکیڈمک کونسل نے پولیٹیکل سائنس کے نصاب سے شاعر ملت ڈاکٹر محمد اقبالؒ پر مبنی ایک باب ہٹانے کی قرارداد منظور کی ہے، جس کی کونسل کے ارکان نے تصدیق بھی کی ہے۔ ایگزیکٹو کونسل اس پر حتمی فیصلہ کرے گی۔
خیال رہے کہ کونسل کا ایک اجلاس گزشتہ روز منعقد ہوا جس کے دوران کونسل نے بیچلر آف ایلیمنٹری ایجوکیشن (بی ایل ایڈ) پروگرام کو چار سالہ مربوط ٹیچر ایجوکیشن پروگرام سے تبدیل کرنے کی قرارداد کی منظوری دی۔
اکیڈمک کونسل کے 6 ارکان نے اس تجویز کے خلاف عدم اتفاق کا اظہار کرتے ہوئے کہا کہ اس سلسلے میں اساتذہ سے کوئی مشاورت نہیں کی گئی۔
عہدیداروں نے بتایا کہ ’ماڈرن انڈین پولیٹیکل تھاٹ‘ کے عنوان سے باب بی اے کے چھٹے سمسٹر کے نصاب کا حصہ ہے، اب یہ معاملہ یونیورسٹی کی ایگزیکٹو کونسل کے سامنے رکھا جائے گا جو حتمی فیصلہ کرے گی۔
اکیڈمک کونسل کے ایک رکن نے کہا کہ سیاسیات کے نصاب میں تبدیلی کے حوالے سے ایک قرارداد لائی گئی تھی۔ جس کے مطابق اقبال پر ایک باب تھا جسے نصاب سے نکال دیا گیا ہے۔
دریں اثناء راشٹریہ سویم سیوک سنگھ (آر ایس ایس) سے وابستہ شخصیات نے اس پیشرفت کا خیرمقدم کیا ہے۔
