کراچی : پی ایس پی سیکٹر انچارج عبدالحمید عرف ندیم مولانا سمیت کئی افراد کے قتل میں ملوث ایم کیو ایم لندن کے مبینہ دہشت گرد کو گرفتار کرلیا گیا۔
تفصیلات کے مطابق محکمہ انسداد دہشت گردی (سی ٹی ڈی) کراچی نے سرجانی ٹاون میں کارروائی کرتے ہوئے ایم کیو ایم لندن گروپ سے تعلق رکھنے والا مبینہ دہشت گرد بلال انیس عرف بلا کو گرفتار کرلیا.
ترجمان سی ٹی ڈی نے بتایا کہ مبینہ دہشت گرد بلال انیس عرف بلا کے قبضے سے اسلحہ برآمد ہوا، ملزم پی ایس پی سیکٹر انچارج عبدالحمید عرف ندیم مولانا کی ٹارگٹ کلنگ کا مفرور ملزم ہے۔
گرفتار ملزم نے دوران تفتیش سنسنی خیز انکشافات کئے، ملزم ایم کیو ایم کے تربیت یافتہ دہشتگرد اور ٹارگٹ کلنگ ٹیم کا اہم رکن ہے اور ٹارگٹ کلنگ ٹیم ساوتھ افریقہ سے دہشت گرد آصف عبداللہ چلاتا ہے، ساوتھ افریقہ سے قتل کی ہدیات دی جاتی تھی۔
ترجمان کا کہنا تھا کہ 2017ء میں آصف عبداللہ نے لندن سے ملنے والی ہدایت پر5 رکنی ٹیم بنائی، ٹیم میں بلال انیس سمیت رحیم ،دانش ،اویس اور رضوان شامل تھے، ساوتھ افریقہ سے سیکٹر انچارج پی ایس پی عبدالحمید عرف ندیم مولانا کو قتل کی ہدایت دی گئی۔
سی ٹی ڈی نے کہا کہ جس کے بعد ٹیم کے ہمراہ ریکی کرکے قطر اسپتال کے قریب عبدالحمید وعرف ندیم مولانا اور راشد لعل کو قتل کیا، قتل کے الزام میں ساتھی راشد اور دانش گرفتار ہوگئے تھے۔
ملزم نے بیان دیتے ہوئے کہا کہ میں اس کیس پر تاحال مفرور تھا، کیس میں مجھ سمیت دونوں گرفتار ملزمان کو 26،26سال سزا ہوئی، قتل میں لندن کی اعلیٰ قیادت کی جانب سے آصف عبداللہ نے شاباشی دی اور رقم بھجوائی۔
ترجمان سی ٹی ڈی نے بتایا کہ بلال انیس نے 2014ء میں بھی قتل کا انکشاف کیا، ملزم کئی واردات میں پولیس کو مطلوب تھا اور تین مرتبہ جیل جاچکا ہے تاہم گرفتار ملزم سے مزید تفتیش کی جارہی ہے۔
