The news is by your side.

Advertisement

فٹ رہنے کے لیے یہ طریقے اپنائیں

ہماری روزمرہ کی مصروف زندگی میں اتنا وقت نہیں مل پاتا کہ ہم باقاعدہ جم جا کر ورزش کریں۔ اگر ہم گھر میں ہی ہلکی پھلکی ورزش کریں تو اس میں باقاعدگی نہیں رہ پاتی۔ غیر متوازن طرز زندگی بعض دفعہ کئی مسائل پیدا کر دیتی ہے۔ پھر ایسا کیا کیا جائے کہ ہم فٹ رہ سکیں۔

طبی ماہرین نے کچھ ایسے ہی طریقے بتائے ہیں جنہیں اپنا کر ہم بغیر کسی محنت کے فٹ رہ سکتے ہیں۔


اسنیکس کا استعمال کم کریں

اسنیکس کا استعمال کم سے کم کریں۔ یہ آپ کی بھوک کو ختم کردیتے ہیں جس کی وجہ سے آپ متوازن غذا نہیں لے پاتے۔ اسنیکس وزن میں بھی اضافہ کرتے ہیں۔


کھانے کے وقت مداخلت سے بچیں

کھانا کھاتے ہوئے موبائل، میوزک یا ٹی وی سے دور رہیں۔ آپ کا سارا دھیان اس پر ہونا چاہیئے کہ آپ کیا کھا رہے ہیں۔ غذا کو ٹھیک طرح سے کھانے اور اس کے جزو بدن ہونے کے لیے ضروری ہے کہ آپ پوری توجہ سے اسے کھائیں۔


خاندان اور دوستوں کے ساتھ وقت گزاریں

لوگ اکثر شکایت کرتے ہیں کہ وہ تنہائی کا شکار ہیں، پریشان ہیں یا اسٹریسڈ ہیں۔ اس کی وجہ یہی ہے کہ وہ اپنے خاندان یا دوستوں کے ساتھ وقت نہیں گزارتے۔

دوستوں اور خاندان کے ساتھ وقت گزارنا صحت اور دماغ پر اچھے اثرات مرتب کرتا ہے۔


چھوٹی پلیٹ استعمال کریں

کھانے کے لیے چھوٹی پلیٹ استعمال کریں۔ بڑی پلیٹ میں کم کھانا آپ کے دماغ کو یہ سگنل دے گا کہ آپ نے کم کھانا لیا ہے۔ جبکہ چھوٹی پلیٹ میں پورا کھانا آپ کو اطمینان کا احساس دلائے گا کہ آپ ایک بھرپور کھانا کھا رہے ہیں۔


بڑے گلاس استعمال کریں

چھوٹی پلیٹس کے ساتھ بڑے گلاسوں کا استعمال کریں تاکہ آپ دودھ، جوس یا پانی کی زیادہ مقدار لیں۔


پروٹین سے بھرپور ناشتہ

ناشتہ کبھی بھی مت چھوڑیں۔ ناشتہ چھوڑنا دن بھر آپ کو سست رکھتا ہے جبکہ یہ وزن میں بھی اضافہ کرتا ہے۔ ناشتے میں پروٹین سے بھرپور اشیا کا استعمال کریں۔ یہ سارا دن آپ کی توانائی کو بحال رکھتا ہے۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

Comments

comments

یہ بھی پڑھیں