کراچی : امیر جماعت اسلامی پاکستان سینیٹر سرا ج الحق نے کہا ہے کہ کشمیری ماؤں،بہنوں ،بیٹیوں کی عظیم قربانیوں سے ہی مقوضہ کشمیر میں آزادی کی تحریک آگے بڑھ رہی ہے، شہدا ء کی ماؤں کو خراج تحسین پیش کرتے ہیں۔
ان خیالات کا اظہار انہوں نے کراچی میں جماعت اسلامی حلقہ خواتین کی مرکزی شورٰی کے اجلاس سے خطاب کرتے ہوئے کیا، انہوں نے کہا کہ ہم کشمیر کی ان عظیم ماؤں کو سلام پیش کرتے ہیں جنہوں نے تحریک آزادی کشمیر کے لیے اپنے بیٹوں کو قربان کیا۔
سینیٹر سراج الحق نے مزید کہا کہ دنیا میں کوئی تحریک بھی خواتین کے بغیر اپنے مقاصد کو حاصل نہیں کرسکتی ،جس طرح تحریک پاکستان میں خواتین کا نمایاں کردار تھا، اسی طرح کشمیر کی جدوجہد آزادی میں خواتین نے بنیادی کردار ادا کیاہے۔
بھارتی ظلم و جبر کے سامنے کشمیری عوام پہاڑ کی طرح کھڑے ہیں، پاکستان کی خواتین کشمیر کی جرأت مند ماؤں بہنوں بیٹیوں کا پیغام ہر گھر میں پہنچائیں، کشمیری ہمارے تعاون اور مدد کے مستحق ہیں۔
انہوں نے کہا کہ پاکستان کو اسلامی و فلاحی ریاست بنانے کے لیے خواتین کو اپنے محاذ پر جدوجہد کو لے کر آگے بڑھنا ہوگا۔
مغربی طاقتیں اور مغرب کی پروردہ این جی اوز پاکستان کی اسلامی شناخت کو ختم کرنے اور اپنے سیکولر ایجنڈا کی تکمیل اور مادر پدر آزاد معاشرے کے لیے سرگرم ہیں،ان کے اس دین بے زار ایجنڈے کو ناکام بنانے اور اسلامی معاشرے کی تشکیل کے لیے خواتین موثر کردار ادا کر سکتی ہیں۔
