امریکا نے ایک بار پھر پاکستان کو ایران سے گیس پائپ لائن سمیت کسی بھی معاہدے سے دور رہنے کا کہہ دیا۔
ترجمان امریکی محکمہ خارجہ میتھیوملر نے پریس کانفرنس کرتے ہوئے کہا کہ پاکستان کو ایران کیساتھ کسی بھی معاہدے سے باز رہنے کا مشورہ دیتے ہیں، امریکا، پاک ایران گیس پائپ لائن منصوبےکےحق میں نہیں ہے اور ایران کیساتھ کاروبار سے ہماری پابندیوں میں آنےکا خطرہ ہے۔
ترجمان نے پاکستان میں چینی انجینئرز پر دہشت گردوں کےحملوں کی مذمت کرتے ہوئے کہا کہ ہمیں پاکستان میں جانی نقصان پر دکھ ہوا ہے دہشت گردوں کے ہاتھوں پاکستانی عوام کو بہت زیادہ نقصان اٹھانا پڑا ہے حملے سے متاثر ہونے والوں سے دلی تعزیت کا اظہار کرتے ہیں۔
انہوں نے کہا کہ پاکستان میں چین کےشہری بھی دہشت گردی کے حملوں کا شکار ہوئے کسی بھی ملک کو دہشت گردی کی کارروائیوں کا شکار نہیں ہونا چاہیے۔
ترجمان امریکی محکمہ خارجہ سے پاکستان میں ججز کےخط پر سوال کیا گیا تو انہوں نے کہا کہ میں نے ججز کا خط دیکھا ہے لیکن ابھی اس پر مشاورت کا موقع نہیں ملا۔
