امریکا کے صدر جوبائیڈن نے ڈونلڈ ٹرمپ کی نا اہلی پر رد عمل دیتے ہوئے کہا ہے کہ کوئی شک ہی نہیں ڈونلڈ ٹرمپ نے بغاوت کی۔
میڈیا سے گفتگو کرتے ہوئے امریکی صدر کا کہنا تھا کہ وہ یہ معاملہ عدالت پر چھوڑتے ہیں کہ آیا چودھویں ترمیم کا سابق صدر پر اطلاق ہوتا ہے یا نہیں۔
یاد رہے کہ ڈونلڈ ٹرمپ نے کولوراڈو عدالت سے نااہلی چیلنج کرنے کا اعلان کیا ہے۔ امریکا میں اگلے برس نومبر میں صدارتی انتخابات کا انعقاد ہوگا۔
دوسری جانب امریکی صدر جوبائیڈ ن کا کہنا ہے کہ اسرائیل اور حماس کے درمیان قیدیوں کی رہائی اور جنگ بندی کے لیے جلد نئے معاہدے کی توقع نہیں ہے۔
ان کا یہ بیان ایسے وقت میں آیا ہے جب حماس اور اسرائیلی نمائندے ایک نئے معاہدے پر پہنچنے کی کوشش میں مصر میں ملاقات کر رہے تھے۔
حماس کے سربراہ اسماعیل ہنیہ مصر میں موجود ہیں جو قطر کی ثالثی میں جنگ بندی معاہدے کے لیے حکام سے مذاکرات کر رہے ہیں۔
’یرغمالیوں کی رہائی کے بعد اسرائیل بڑی قتل و غارت گری کر سکتا ہے‘
الجزیرہ کے ساتھ ایک انٹرویو میں حماس کے عہدیدار غازی حماد نے کہا ہے کہ جاری مذاکرات کے درمیان گروپ کی ”ترجیح”جنگ کو روکنا ہے۔انہوں نے کہا کہ ہمارا نقطہ نظر بہت واضح ہے ہم جارحیت کو روکنا چاہتے ہیں۔
