اڑیسہ: بھارتی ریاست اڑیسہ کے ایک علاقے میں لڑکی والوں کی طرف سے باراتیوں کو مٹن نہ کھلانے پر ناراض دولھے نے ایک ایسا عجیب قدم اٹھایا جس نے لوگوں کو حیران و پریشان کر دیا۔
تفصیلات کے مطابق بھارت میں دولھے اور دلہنوں کے عجیب و غریب قصے سامنے آتے رہتے ہیں، اب اڑیسہ کے شہر جے پور میں بدھ کے روز ایک دولھا اس بات پر شادی کی تقریب چھوڑ کر چلا گیا کہ لڑکی والوں کی طرف سے کھانے میں مٹن کا سالن نہیں تھا۔
صرف یہی بات نہیں کہ دولھا شادی چھوڑ کر چلا گیا بلکہ اس نے جا کر ایک اور لڑکی سے شادی کر لی۔
سُکندا ٹاؤن کے علاقے بندھاگاؤں میں شادی کی تقریب تیار تھی، شادی کی رسومات شروع ہی ہونے والی تھیں کہ دولھے کو معلوم ہوا کہ کھانے کے مینو میں مٹن کا سالن نہیں ہے، یہ جان کر وہ غصے سے تقریب چھوڑ کر چلا گیا۔
27 سالہ دولھے راماکانت پترا اس بات پر شدید ناراض ہو گیا تھا کہ دلہن کی فیملی نے باراتیوں کو مٹن کیوں نہیں کھلایا، راماکانت نے وہاں سے نکلنے کے بعد ایک اور جگہ کسی اور عورت سے شادی کر لی، اور اس کے بعد ہی گھر لوٹا۔
جب باراتیوں کو کھانے کے ہال میں لے جایا گیا تو مٹن کا سالن تیار نہیں ہوا تھا، جس پر انھوں نے دلہن کے خاندان والوں کے ساتھ جھگڑا شروع کر دیا، جو بڑھتے بڑھتے شدت اختیار کر گیا۔ اسی دوران دولھے کو پتا چل گیا، اس نے شادی ختم کرنے کا اعلان کر دیا۔
دلہن کے گھر والوں نے منتیں کیں، اور دولھے کو راضی کرنے کی کوشش کی لیکن وہ ڈٹا رہا، اور پھر وہ باراتیوں کو لے کر ایک رشتہ دار کے گھر چلا گیا، جہاں وہ باقی سارا دن رہا، اگلے دن اس نے ایک اور گاؤں میں کسی اور لڑکی سے شادی کر لی اور گھر لوٹ آیا۔
