خیبرپختونخوا کے عوام سے متعلق بیان پر عوامی نیشنل پارٹی (اے این پی) نے نواز شریف سے معافی مانگے کا مطالبہ کردیا۔
عوامی نیشنل پارٹی (اے این پی) کی ترجمان ثمر ہارون بلور نے ٹوئٹر پر نواز شریف کے بیان کی مذمت کی اور لکھا نوازشریف صاحب اپنے الفاظ واپس لے کر پوری قوم سے معافی مانگیں۔
ترجمان کا کہنا تھا کہ نون لیگ کے قائد اور تین بار وزیراعظم کے عہدے پر رہنے والے شخص کو یہ زیب نہیں دیتا کہ ایک صوبے کے عوام کو بیوقوف کہے۔
انہوں نے کہا کہ یہ لوگ کس منہ سے یہاں آکر ووٹ مانگیں گے، ماضی میں اسی جماعت نے ہمارے حقوق دینے سے انکار کیا تھا، جس پر عبدالولی خان نے اتحاد سے نکلنے کا اعلان کیا تھا۔
ثمربلور نے مزید کہا کہ نوازشریف صاحب شاید آج ایک بار پھر تاریخ دہرا رہے ہیں، ہمیں معلوم ہے پنجاب کا ڈومیسائل رکھنے والا ہر شخص اس ملک میں معزز سمجھا جاتا ہے لیکن پختونخوا کے عوام کے نمائندے ابھی زندہ ہیں۔
خیال رہے کہ لاہور میں منشور جاری کرنے کی تقریب سے خطاب میں نواز شریف نےکہا تھا کہ خیبرپختونخوا کے لوگ آسانی سے بیوقوف بن جاتے ہیں، یہ بیماری خیبرپختونخوا سے ہی آئی ہے، 2013 میں ان کی حکومت بننے ہی نہیں دینی تھی، نہ ہوتا بانس نہ بجتی بانسری۔
