ماسکو : کورونا وائرس کو شکست دینے کے لیے سائنسدانوں نے کوششیں تیز کر دی ہیں اور اسی سلسلے میں روس کی سیکنوو یونیورسٹی میں اینٹی کورونا ویکسین کے طبی تجربات کا آغاز کردیا گیا ہے۔
تفصیلات کے مطابق دنیا بھر میں اس وقت کورونا وائرس کے کیسز میں مسلسل اضافہ دیکھا جا رہا ہے، سائنسدان اس وبا سے نمٹنے کے لیے ویکسین بنانے کی تیاریوں میں دن رات مصروف عمل ہیں۔
اس حوالے سے روس سے ایک اچھی خبر سامنے آئی ہے، یہاں ایک یونیورسٹی میں کورونا وائرس کے ویکسین کا ٹرائل مکمل کر لیا گیا ہے۔
روس کی سیکنوو یونیورسٹی کی جانب سے کوویڈ19 کی ویکسین کا کامیاب تجربہ کرنے کا دعویٰ کیا گیا ہے، یونیورسٹی کے محکمہ کلینیکل ریسرچ اینڈ میڈیکیشنز کے اہم محقق الینا سمولیاروچک نے بتایا ہے کہ اس کی تحقیق مکمل ہوچکی ہے اور یہ ثابت ہوگیا ہے کہ یہ ویکسین مکمل طور پر محفوظ ہے۔
ویکسین کے سلسلے میں بھارت میں واقع روسی سفارت خانے نے کہا ہے کہ یہ کورونا انفیکشن کے خلاف تیار کی جانے والی پہلی کامیاب ویکسین ہے۔
مزید پڑھیں : کرونا وائرس کی ویکسین کا تجربہ کامیاب، اطالوی محققین کا دعویٰ
قابل ذکر بات ہے کہ کورونا وبا سے نمٹنے کے لیے بھارت میں بنی ویکسین کے بھی کلینکل ٹرائل چل رہے ہیں، اس کے علاوہ برطانیہ کی آکسفورڈ یونیورسٹی میں تیار کی جانے والی ویکسین کا بھی ٹرائل کیا جارہا ہے۔
مزید پڑھیں: چین کرونا ویکسین بنانے کے قریب پہنچ گیا
دوسری جانب جرمنی میں بھی کورونا وائرس ویکسین کے پہلے تجربےکی اجازت دے دی گئی ہے، ویکسین 200 صحت مند رضاکاروں پر آزمائی جائے گی۔
