اسلام آباد : مارچ، اپریل کی ذیلی پولیو مہم کا دوسرا مرحلہ آج سے شروع ہوگا، خیبر پختونخوا میں شروع ہونے والی انسداد پولیو مہم کے دوران 5سال سے کم عمر کے 3.25 ملین بچوں کو پولیو قطرے پلانے کا ہدف ہے۔
تفصیلات کے مطابق ترجمان وزارت صحت نے کہا ہے کہ دوسرے مرحلے میں خیبرپختونخوا کے27اضلاع میں پولیو مہم ہوگی جبکہ بلوچستان کے 12 اضلاع میں پولیو مہم عید کے بعد ہوگی۔ بلوچستان میں مردم شماری کے باعث پولیو مہم ملتوی ہوئی،
وفاقی وزیرصحت عبدالقادر پٹیل کا کہنا ہے کہ خیبر پختونخوا کے 10 اضلاع میں مکمل طور پر انسداد پولیو مہم ہوگی جس میں جنوبی خیبر پختونخوا کے7 اضلاع اور نوشہرہ، پشاور، سوات شامل ہیں۔
انہوں نے بتایا کہ خیبرپختونخوا کے17 اضلاع کی منتخب یوسیز میں پولیو مہم ہوگی، افغان پناہ گزین کیمپوں، افغانستان سے متصل یوسیز اور ہائی رسک موبائل آبادی شامل ہیں۔
عبدالقادر پٹیل کے مطابق کے پی میں 5سال سے کم عمر کے 3.25 ملین بچوں کو پولیو قطرے پلانے کا ہدف ہے، رواں برس پولیو کا ایک کیس رپورٹ ہوا ہے، کے پی میں مجموعی طور پر 24 ہزار269 پولیو ورکرز مہم میں حصہ لیں گے۔
