ڈیوٹی لگانے پر جھگڑا، سپرنٹنڈنٹ نے ماتحت ملازم کو اپنی ہی جیل میں بند کروا دیا

شیخوپورہ میں ڈیوٹی لگانے کے جھگڑے میں جیل سپرنٹنڈنٹ نے جونیئر کلرک ادریس جاوید کو اپنی ہی جیل میں سلاخوں کے پیچھے بند کروا دیا۔

اے آر وائی نیوز کو ذرائع نے بتایا ہے کہ شیخوپورہ کی ڈسٹرکٹ جیل میں ڈیوٹی لگانے پر جونیئر کلرک کا جیل سپرنٹنڈنٹ سے جھگڑا ہوا تھا جس کے بعد سپرنٹنڈنٹ نے اس جونیئر کلرک ادریس جاوید کو نہ صرف اپنی ہی جیل میں سلاخوں کے پیچھے بند کروا دیا بلکہ تھانہ سٹی بی ڈویژن میں مقدمہ بھی درج کرا دیا ہے۔

تھانے میں درج ایف آئی آر میں کہا گیا ہے کہ مذکورہ جونیئر کلرک نے سپرنٹنڈنٹ سے ہاتھا پائی کی، افسر کو نہ صرف زدوکوب کیا بلکہ اس کی یونیفارم بھی پھاڑ دی۔

دوسری جانب ڈی آئی جی جیل خانہ جات نے واقعے کا نوٹس لیتے ہوئے جونیئر کلرک ادریس کو معطل کردیا ہے۔

Comments