شوبز انڈسٹری کی معروف اداکارہ عریشہ رضی خان نے شادی کی تصاویر پر سوشل میڈیا ٹرولنگ پر خاموشی توڑ دی۔
حال ہی میں رشتہ ازدواج میں منسلک ہونے والی نوجوان اداکارہ عریشہ رضی خان اور عبدالصمد ضیا کی شادی کی تصاویر پر سوشل میڈیا صارفین نے ٹرولنگ کا نشانہ بنایا جس پر اداکارہ نے برہمی کا اظہار کیا ہے۔
عریشہ رضی کی شادی کی تقریبات کا آغاز ڈھولکی، قوالی نائٹ، مایوں سے ہوا جبکہ 10 فروری کو رخصتی ہوئی۔
اداکارہ نے اپنی رخصتی پر لال رنگ کا خوبصورت عروسی لباس زیب تن کیا جس پر انہوں نے بھاری جیولری بھی پہنی۔
عریشہ رضی نے اپنی شادی کی تقریب میں بالی ووڈ کے مشہور گانے ’چھمک چھلو‘ پر رقص بھی کیا، جس کی ویڈیوز سوشل میڈیا پر وائرل ہوئی تھی تاہم کچھ سوشل میڈیا صارفین نے اداکارہ کو اپنی شادی پر رقص کرنے پر تنقید کا نشانہ بنایا تھا۔
انہوں نے ولیمے میں شوہر کے ہمراہ فوٹو شوٹ کروایا تھا جس پر بھی سوشل میڈیا پر انہیں تنقید کا نشانہ بنایا گیا تھا۔
عریشہ رضی خان تنقید کرنے پرانسٹاگرام اسٹوری پر لکھا کہ ’میں آج ایک بات جاننا چاہتی ہوں، تنقید اور نفرت بھرے کمنٹس کرنے سے لوگوں کو کیا ملتا ہے؟‘
انہوں نے لکھا کہ ’آپ کو معلوم ہونا چاہیے کہ یہ دلہن کا بڑا دن ہوتا ہے، اور اس دن کے لیے اس نے کئی سال سے پلاننگ کر رکھی تھی، تو آپ لوگ اس کا خاص دن برباد کیوں کررہے ہیں؟
اداکارہ نے کہا کہ ’اگر آپ کو انٹرنیٹ پر کوئی چیز نہیں پسند تو نظر انداز کردیں، نفرت پھیلانے کے بجائے انہیں آئندہ زندگی کے لیے نیک خواہشات کا اظہار کریں، اگر آپ کسی دوسرے پر انگلی اٹھاتے ہیں تو اللہ کسی بھی دن آپ پر بھی وہی وقت لاسکتا ہے‘۔
یاد رہے کہ عریشہ رضی خان کا نکاح سال 2022 میں عبدالصمد ضیا سے ہوا تھا۔
