بالی ووڈ کے معروف اداکار ارجن کپور نے ’سنگھم اگین‘ میں ولن کا کردار نبھانے کی وجہ بیان کردی۔
بالی ووڈ کی معروف اداکارہ دیپیکا پڈوکون اور ایکشن ہیرو ٹائیگر شیرف کے بعد روہت شیٹی نے ارجن کپور کا ’سنگھم اگین‘ کے ذریعے اپنی ’پولیس یونیورس‘ کا حصہ بنا لیا ہے۔ اس سے قبل میکرز نے بلاک بسٹر فرنچائز کی تیسری فلم کی جھلک جاری کی ہے جس میں ارجن کپور بطور ولن نظر آرہے ہیں۔
سوشل میڈیا پلیٹ فارم انسٹاگرام پر ’شیطان‘ کے کردار کے پوسٹر کو شیئر کرتے ہوئے ہدایت کار نے لکھا تھا کہ ’’انسان غلطی کرتا ہے اور اسے اسکی سزا بھی ملتی ہے لیکن اب جو آئے گا، وہ شیطان ہے۔‘‘
تاہم اب ارجن کپور نے ’سنگھم اگین‘ میں اپنے ولن کے کردار سے متعلق لب کشائی کی ہے۔
ارجن کپور نے آدتیہ چوپڑا اور روہت شیٹی کا شکریہ ادا کیا اور کہا کہ انہوں نے مجھ پر فلم ’سنگھم اگین‘ میں منفی کردار ادا کرنے کے لیے میرا انتخاب کیا۔
انہوں نے کہا کہ انڈسٹری میں اپنے کیریئر کا آغاز میں نے فلم ’عشق زادے۔‘ ’اورنگزیب‘ جیسے منفی کرداروں سے کیا اور ان سب کرداروں کے بعد میں یہاں ہوں اور اب پھر سنگھم اگین میں ولن کا کردار ادا کررہا ہوں۔
اداکار نے کہا کہ آدتیہ چوپڑا اور روہت شیٹی نے میرے فلمی کیریئر میں ہمیشہ مدد کی اور ان کا ماننا ہے کہ میں ان کی فلم سنگھم اگین میں ولن کا کردار ادا کرکے لوگوں کو حیران کرسکتا ہوں۔
ارجن نے کہا کہ میں ہمیشہ اسکرین پر تجربہ کرنا چاہتا ہوں اور ناظرین کو کچھ مختلف دکھانا چاہتا ہوں لہٰذا میرے لیے سنگھم اگین میں پولیس کے دشمن کا کردار ادا کرنا میرے لیے ایک سنسنی خیز موقع تھا۔
انہوں نے کہا کہ مجھے کیریئر کے شروع میں منفی کردار ادا کرنے سے بہت زیادہ پیار ملا اور میں اس فلم کے ساتھ بھی ایسا ہی بلکہ اس سے زیادہ بہترین کردار ادا کرنا چاہتا ہوں۔
