لاہور : وزیرداخلہ پنجاب ہاشم ڈوگر نے کہا ہے کہ رانا ثناء اللہ کی گرفتاری سے متعلق اگلا اقدام پیر کو عدالتی احکامات کے بعد کریں گے۔
ان خیالات کا اظہار انہوں نے لاہور میں پریس کانفرنس سے خطاب کرتے ہوئے کیا، صوبائی وزیرداخلہ نے کہا ہے کہ وفاقی وزیر داخلہ رانا ثناء اللہ کیخلاف وارنٹ گرفتاری عدالت سے جاری ہوئے تھے۔
انہوں نے کہا کہ اسلام آباد پولیس نے آج ہم سے تعاون نہیں کیا، عدالتی احکامات کے بعد پولیس کی معاونت سے مزید کارروائی کی جائے گی۔
وزیرداخلہ پنجاب ہاشم ڈوگر نے بتایا کہ محکمہ اینٹی کرپشن کی ٹیم عدالت کے حکم پر وہاں گئی تھی، اب جب پیر کو عدالت کھلے گی، جس کے بعد محکمہ اینٹی کرپشن اپنی رپورٹ جمع کرائے گا۔
ہاشم ڈوگر نے مزید کہا کہ پیر کو رپورٹ جمع کرانے کے بعد عدالت جو احکامات صادر کرے گی اس پر من و عن عمل کریں گے۔
واضح رہے کہ ڈپٹی ڈائریکٹر اینٹی کرپشن نے میڈیا کو بتایا ہے کہ اینٹی کرپشن ٹیم نے وارنٹ کی تعمیل کیلئے تھانہ سیکریٹریٹ سے معاونت طلب کی تھی۔
ڈپٹی ڈائریکٹر کا کہنا تھا کہ تھانہ سیکریٹریٹ نے ہمارے ساتھ کسی قسم کا کوئی تعاون نہیں کیا اور نہ ہی تھانہ سیکریٹریٹ نے ٹیم کی آمد اور روانگی روزنامچے میں درج نہیں کی۔
مزید پڑھیں : اینٹی کرپشن کی ٹیم رانا ثناء اللہ کو گرفتار نہ کرسکی، ناکام واپس روانہ
ڈی ڈی اینٹی کرپشن کا مزید کہنا ہے کہ تھانہ سیکریٹریٹ نے اپنے پولیس حکام سے رابطہ کئے تھے، ڈپٹی ڈائریکٹر تھانہ سیکریٹریٹ کو قانون کے مطابق عدالتی حکم پرعمل درآمد کرانا چاہیے تھا۔
یاد رہے کہ ترجمان اینٹی کرپشن نے وضاحت کی ہے کہ اینٹی کرپشن انکوائری میں حاضر نہ ہونے کے باعث رانا ثنا اللہ کے ناقابل ضمانت وارنٹ گرفتاری مقدمہ نمبر20/19 میں جاری ہوئے ہیں۔