دبئی : ایشیا کپ میں پاکستانی ٹیم کپتان سرفراز احمد کی قیادت میں اپنا پہلا میچ آج ہانگ کانگ کے خلاف کھیلے گی۔
تفصیلات کے مطابق ایشیا کپ میں پاکستان کا پہلا میچ آج کوالیفائر ہانگ کانگ سے ہوگا، شاہینوں نے پہلے میچ کے لیے حکمت عملی تیار کر لی۔
پاکستان اور ہانگ کانگ کے درمیان میچ پاکستانی وقت کے مطابق شام ساڑھے 4 بجے شروع ہوگا۔
ایشیا کپ کو گروپ ’اے‘ اور ’بی‘ میں تقسیم کیا گیا ہے، ایونٹ کے گروپ اے میں دفاعی چیمپئن بھارت ، پاکستان اور ایک کوالیفائرٹیم ہانگ کانگ شام ہے جبکہ گروپ بی سری لنکا، بنگلہ دیش اور افغانستان پرمشتمل ہے۔
بنگلا دیش کا ایشیا کپ میں فاتحانہ آغاز
یاد رہے کہ گزشتہ روز ایشیا کپ کرکٹ ٹورنامنٹ کے افتتاحی میچ میں بنگلہ دیش نے سری لنکا کو 137 رنزسے شرمناک شکست دی تھی۔
ایشیا کپ کے پہلے میچ میں بنگلہ دیش نے سری لنکا کو جیت کے لیے 262 رنز کا ہدف دیا تھا تاہم سری لنکا کی پوری ٹیم 35.1 اوورز میں 124 رنزبنا کرآؤٹ ہوگئی تھی۔
واضح رہے کہ دو روز قبل قومی کرکٹ ٹیم کے کپتان سرفراز احمد نے ایشیا کپ میں عمدہ کارکردگی کا عزم ظاہر کرتے ہوئے کہا تھا کہ ایونٹ میں شاندار کارکردگی دکھاتے ہوئے ٹائٹل اپنے نام کرنے کی کوشش کریں گے۔
