کراچی: سیاسی جوڑ توڑ اور حکومت سازی کے لیے ملاقاتوں اور اہم مشاورت کے سلسلے میں سابق صدر آصف علی زرداری کے طیارے نے کراچی، لاہور، اسلام آباد کے درمیان 3 دن کے دوران متعدد چکر لگائے ہیں۔
ذرائع کے مطابق پیپلز پارٹی کے شریک چیئرمین آصف زرداری کے طیارے نے گزشتہ 3 دن میں 9 پروازیں کی ہیں، ان کا طیارہ 8 فروری کو شام 4 بجے کراچی سے نوابشاہ پہنچا تھا۔
ذرائع کے مطابق 8 فروری کو سابق صدر کے خصوصی طیارے نے نوابشاہ ایئرپورٹ سے شام 6 بجے اڑان بھری اور شام 7:30 بجے اسلام آباد لینڈنگ کی، خصوصی طیارہ پھر 9 فروری بہ روز جمعہ شام 5:20 بجے اسلام آباد سے سکھر پہنچا۔ 9 فروری ہی کو خصوصی طیارہ سکھر ایئرپورٹ سے بلاول بھٹو زرداری کو لے کر رات 7:30 بجے لاہور پہنچا۔
آصف زرداری کا خصوصی طیارہ جمعہ کے روز ہی رات 8:35 پر لاہور سے اسلام آباد ایئرپورٹ لینڈ کر گیا، 9 فروری کو ہی طیارہ ایک گھنٹے بعد پھر ن لیگی قیادت سے مشاورت کے لیے رات 9:45 پر اسلام آباد سے واپس لاہور پہنچا۔
10 فروری کو ہفتہ صبح 9 بجے لاہور سے یہ طیارہ پھر روانہ ہوا اور صبح 10:15 پر کراچی لینڈ ہوا، کراچی میں چند گھنٹے قیام کے بعد آصف زرداری کا خصوصی طیارہ ایک بار پھر دوپہر ایک بجے کراچی سے لاہور روانہ ہوا، اور دوپہر 2:30 بجے لاہور ایئرپورٹ لینڈ ہوا۔
ذرائع کے مطابق 10 فروری کو آصف زرداری کا خصوصی طیارہ ایک بار پھر لاہور سے رات 8:55 بجے روانہ ہوا، اور رات 9:50 بجے اسلام آباد ایئرپورٹ پہنچا، اب گزشتہ رات سے آصف زرداری کا خصوصی طیارہ تاحال اسلام آباد ایئرپورٹ پر کھڑا ہے۔
