اسلام آباد: چیئرمین پی ٹی آئی نے گزشتہ روز توشہ خانہ کیس میں سزا اور گرفتاری کے بعد رات اٹک جیل میں گزاری، انھیں جیل میں متعدد سہولیات فراہم کی گئی ہیں۔
تفصیلات کے مطابق گرفتاری کے بعد چیئرمین پی ٹی آئی کا گزشتہ رات پمز اسپتال میں طبی معائنہ کیا گیا، اور انھوں نے رات اٹک جیل میں گزاری، جہاں انھیں جیل مینوئل کے مطابق سہولتیں فراہم کی گئیں۔
جیل میں پی ٹی آئی چیئرمین کو جو سہولیات فراہم کی گئی ہیں ان میں تولیہ، ٹشو پیپر، پینے کا پانی، چشمہ، تسبیح اور گھڑی شامل ہیں، یہ اشیا انھیں رکھنے کی اجازت ہے۔
چیئرمین پی ٹی آئی کو جیل میں پانی، کرسی، اور زمین پر سونے کے لیے میٹرس بھی فراہم کر دیا گیا ہے، تاہم دوسری طرف کولر اور ایئرکنڈیشنڈ جیسی سہولیات عدالتی حکم سے مشروط ہیں۔
چیئرمین پی آئی کو گزشتہ روز ایس ایس پی سی آئی اے ملک لیاقت کی زیر سربراہی پولیس ٹیم نے گرفتار کیا تھا، ان کی چیئرمین پی ٹی آئی کے ساتھ گاڑی میں بیٹھے ہوئے تصویر بھی سامنے آئی۔
چیئرمین پی ٹی آئی کی لاہور سے اٹک جیل منتقلی کی تفصیلات سامنے آ گئیں
واضح رہے کہ گزشتہ روز توشہ خانہ فوجداری کیس میں اسلام آباد کی سیشن عدالت کے جج ہمایوں دلاور نے چیئرمین پی ٹی آئی کو بے ایمانی اور بد عنوانی کا مرتکب قرار دیا، اور انھیں تین سال کی قید اور لاکھ روپے جرمانے کی سزا سنائی، جب کہ پانچ سال کے لیے نا اہل بھی قرار دیا۔
