پاکستان میں اسمگل شدہ تیل کی آمد کے بھیانک اثرات سامنے آنا شروع ہو گئے ہیں، اٹک ریفائنری نے مقامی تیل کی طلب میں کمی پر بڑا یونٹ بند کر دیا۔
اے آر وائی نیوز کے مطابق اسمگل شدہ ایرانی تیل کے بھیانک اثرات سامنے آنے لگے ہیں، ملک میں تیل صاف کرنے کے بڑے کارخانے اٹک ریفائنری کے بند ہونے کا خطرہ پیدا ہو گیا ہے۔
ریفائنری انتظامیہ کا کہنا ہے کہ اسمگل شدہ تیل کی فراوانی کے باعث ریفائنری کے تیل کی طلب میں شدید کمی ہوئی ہے، جس کے بعد ریفائنری کی پیداوار کم کر کے 33 فی صد کر دی گئی ہے۔
اوگرا کو لکھے گئے خط میں کہا گیا ہے کہ اسمگل شدہ تیل کی وجہ سے آئل مارکیٹنگ کمپنیوں نے ریفائنری سے تیل کی خریداری میں کمی کر دی ہے، جس کے نتیجے میں 32 ہزار 400 بیرل یومیہ تیل صاف کرنے والا یونٹ بند کر دیا گیا ہے۔
اوگرا اور پٹرولیم ڈویژن کو لکھے گئے خط میں کہا گیا ہے کہ اٹک آئل ریفائنری صرف 33 فی صد صلاحیت پر چل رہی ہے، کمپنیوں کی جانب سے تیل نہ لینے پر ریفائنری مکمل بند کر دی جائے گی، صورت حال بہتر نہ ہونے پر ریفائنری اپ گریڈیشن معاہدے پر نظر ثانی کی جائے گی۔
