ہالی ووڈ کی معروف سائنس فکشن فلم اوتار (Avatar) نے سب سے زیادہ کمانے والی فلم کا منفرد اعزاز ایک عرصے بعد واپس لے لیا۔
تفصیلات کے مطابق سال 2009 میں ریلیز ہونے اور باکس آفس پر دھوم مچانے والی ہالی ووڈ کی سائنس فکشن فلم اوتار نے ایک بار پھر سب سے زیادہ کمانے والی فلم کا اعزاز حاصل کر لیا ہے۔
بی بی سی کی رپورٹ کے مطابق چین میں دوبارہ ریلیز ہونے کے بعد فلم اوتار نے ایک بار پھر ریکارڈ توڑ بزنس کیا ہے، اور اس بار اوتار نے 2.8 بلین ڈالرز کا ریکارڈ بزنس کر کے سب کو پیچھے چھوڑ دیا۔
واضح رہے کہ باکس آفس پر ایک دہائی تک سب سے زیادہ کمانے والی فلم اوتار کو ہالی ووڈ کی ایڈونچر فلم ایوینجرز اِنڈ گیم نے ریلیز کے ابتدائی دنوں ہی میں بزنس کا نیا ریکارڈ قائم کر کے پیچھے چھوڑ دیا تھا۔
سائنس فکشن فلم “اوتار” نے ایک بار پھر دھوم مچا دی
تاہم ہالی ووڈ کے معروف فلم ساز جیمز کیمرون کی یہ بڑی فلم جب رواں ماہ چین میں دوبارہ ریلیز ہوئی تو اس نے ایک بار پھر کھڑکی توڑ بزنس کیا، اور اب تک اوتار نے 2.8 بلین ڈالرز کا ریکارڈ بزنس کیا ہے، صرف جمعے کے روز 4 ملین ڈالرز کے ٹکٹ فروخت ہوئے تھے۔
اس سے قبل ایوینجرز اِنڈ گیم نے ریلیز کے بعد دنیا کے دیگر ممالک میں 1.2 بلین ڈالرز کا ریکارڈ توڑ بزنس کیا تھا۔
