کراچی: معروف ماڈل ایان علی نے سوشل میڈیا پر شوبز میں واپسی کا اعلان کردیا۔
تفصیلات کے مطابق ماڈل ایان علی نے سماجی رابطے کی ویب سائٹ انسٹاگرام پر اعلان کیا کہ وہ 5 سال بعد شوبز میں واپسی کررہی ہیں، انہوں نے سات گانے ریلیز کرنے کا اعلان بھی کیا۔
ماڈل ایان علی نے انسٹاگرام پر اپنی لگژری گاڑی لیمبورگینی کے ساتھ تصویر شیئر کرتے ہوئے لکھا کہ ’اب وقت آگیا ہے اپنی پسندیدہ گاڑی میں اپنے آنے والے سات گانے سننے کا۔‘
ایان علی کا کہنا تھا کہ میں صرف یہ یقین کرنا چاہتی ہوں کہ ان گانوں کی آواز صحیح ہے یا نہیں تاکہ آپ سب میری محنت سے لطف اندوز ہوسکیں، انہوں نے کہا کہ یہ ساتوں گانے ایک ہفتے یا زیادہ سے زیادہ دو ہفتوں تک ریلیز ہوجائیں گے۔
واضح رہے کہ ایان علی نے 4 ماہ قبل مارچ میں بھی انسٹاگرام پر پوسٹ شیئر کی تھی اور اپنے گانے ’ارتھ کوئک‘ کے حوالے سے مداحوں کو آگاہ کرتے ہوئے کہا کہ مجھے یہ بتاتے ہوئے خوشی ہورہی ہے کہ میرا 5 سال قبل ریلیز کیا گیا گانا آج بھی لوگوں میں بے حد مقبول ہے۔
خیال رہے کہ ایان علی کو 14 مارچ 2015 کو اسلام آباد ایئرپورٹ سے 5 لاکھ سے زائد ڈالرز دبئی اسمگل کرتے ہوئے گرفتار کیا گیا تھا۔
بعدازاں انہیں ضمانت پر رہا گیا جس کے بعد وہ بیرون ملک چلی گئیں لیکن درجنوں بار طلبی کے باوجود ایان علی کرنسی اسمگلنگ کیس میں عدالت میں پیش نہیں ہوئیں جس کے باعث ان کو اشتہاری قرار دیا جاچکا ہے۔
