پاکستان کرکٹ ٹیم کے کپتان بابر اعظم نیوزی لینڈ کے خلاف چوتھے ون ڈے میں ایک اور عالمی اعزاز اپنے نام کرلیا اور وہ ایک روزہ میچوں میں تیز ترین 5 ہزار رنز بنانے والے کھلاڑی بن گئے۔
پاکستان اور نیوزی لینڈ کے درمیان پانچ ون ڈے میچوں پر مشتمل سیریز کا چوتھا میچ آج کراچی کے نیشنل اسٹیڈیم میں کھیلا جا رہا ہے۔ قومی کپتان بابر اعظم نے اس میچ میں ایک روزہ میچوں میں تیز ترین پانچ ہزار رنز بنانے والے کھلاڑی کا اعزاز بھی اپنے نام کر لیا ہے۔
بابر اعظم نے آج کے میچ میں اننگ شروع کرنے سے قبل 98 میچز کی 96 اننگز میں 4981 رنز بنا رکھے تھے۔ آج جب انہوں نے اپنی اننگ میں 19 واں رنز بنایا تو نیا عالمی اعزاز اپنے نام کرلیا۔
اس سے قبل یہ اعزاز سابق جنوبی افریقی کھلاڑی ہاشم آملہ کے نام تھا جنہوں نے 2015 میں ویسٹ انڈیز کے خلاف میچ میں انجام دیا تھا اور اپنی 101 اننگ میں پانچ ہزار رنز مکمل کیے تھے۔
بابر اعظم ابھی 28 رنز کے ساتھ کریز پر موجود ہیں اور کئی مزید ریکارڈ ان کے منتظر ہیں۔
واضح رہے کہ رواں سیریز میں ہی بابر اعظم نے ایک اور اہم سنگ میل عبور کیا اور انٹرنیشنل کرکٹ میں 12 ہزار رنز مکمل کیے ہیں۔