کوئٹہ: بلوچستان کے علاقے بلیلی میں پولیو ڈیوٹی کے لیے جانے والی سیکیورٹی گاڑی کے قریب خود کش دھماکے میں خاتون اور پولیس اہلکار سمیت 4 افراد جاں بحق ہو گئے۔
تفصیلات کے مطابق کوئٹہ میں بلیلی کے علاقے میں دھماکے میں سیکیورٹی اہل کاروں سمیت 26 افراد زخمی ہو گئے ہیں، ایک اہل کار اور خاتون سمیت چار شہری جاں بحق ہو گئے، دھماکے کے بعد پولیس نے علاقے کو گھیرے میں لے لیا۔
پولیس حکام کے مطابق دھماکے کے باعث قریب سے گزرنے والی کئی گاڑیاں بھی زد میں آ گئی تھیں، جس کے باعث کئی افراد زخمی ہوئے۔ محکمہ پولیس کے اہل کاروں نے موقع پر پہنچ کر جائے وقوع کا معائنہ کیا، اور شواہد اکٹھے کیے، جب کہ بم ڈسپوزل اسکواڈ کو بھی طلب کر لیا گیا ہے۔
پولیس کی جانب سے دھماکے کے حوالے سے تفصیلات اکھٹی کی جا رہی ہیں، تاکہ دھماکے کی نوعیت کا پتا لگایا جا سکے۔
ڈی آئی جی نے میڈیا سے گفتگو کرتے ہوئے بتایا کہ دھماکے کی زد میں 3 گاڑیاں آئی ہیں، نشانہ بننے والا ٹرک پولیو ڈیوٹی کے لیے جا رہا تھا، پولیس اہلکار انسداد پولیو مہم کی سیکیورٹی کے لیے جا رہے تھے، ہمارا مشن ہے پولیو ٹیم کو فول پروف سیکیورٹی فراہم کریں۔
