ڈھاکہ : بنگلہ دیش میں تیز رفتاری کے باعث خوفناک ٹریفک حادثہ پیش آیا ہے جس میں ٹرک اور پک اَپ وین کے تصادم میں 14 افراد ہلاک اور متعدد زخمی ہوگئے۔
اس حوالے سے مقامی پولیس حکام کے مطابق مرنے والوں کا تعلق مزدور طبقے سے تھا، حادثہ صبح تقریباً 6 بجے بنگلہ دیش کے سلہٹ ضلع میں پیش آیا، زخمیوں کو طبی امداد کے لیے مقامی اسپتالوں میں داخل کرادیا گیا ہے، کچھ زخمیوں کی حالت تشویشناک بتائی جارہی ہے۔
واضح رہے کہ بنگلہ دیش میں دنیا بھر میں سڑک حادثات کے حوالے سے سب سے زیادہ شرح اموات پائیئ جاتی ہے۔ اس کی بنیادی وجہ ناقص شاہراہیں، گاڑیوں کی ناقص دیکھ بھال، ڈرائیوروں کی جانب سے ٹریفک قوانین کی خلاف ورزی اور محکمہ ٹریفک کی نگرانی کا فقدان بتایا جارہا ہے۔
گزشتہ ماہ شائع ہونے والی ایک رپورٹ کے مطابق بنگلہ دیش میں مسلمانوں کے عید الفطر کے تہوار کے رش کے دوران 15 اپریل سے 29 اپریل تک 304 سڑک حادثات میں 328 افراد ہلاک اور 565دیگر زخمی ہوئے۔
