نئی دہلی : بھارت میں کرونا لاک ڈاؤن میں بے روزگاری سے تنگ آکر نائی نے اپنے پیٹ میں چھری گھونپ لی، بروقت ایمبولینس کے نہ پہنچنے پر پولیس موبائل میں زخمی کو اسپتال پہنچایا گیا۔
تفصیلات کے مطابق لاک ڈاون کے دوران کاروبار بند ہونے اور مالی بحران کے باعث پونا شہر کے رہائشی نائی کا کام کرنے والے جیرام گائیکواڑ نے منگل کی شام کو مبینہ طور پر اپنی جان لینے کی کوشش کی۔
پولیس کے مطابق وہ شام کے وقت اپنے گھر سے نکلا، علاقے میں قائم عوامی بیت الخلا میں گیا اور اس نے اپنے کام کرنے والی قینچی کی نوک اپنے پیٹ میں گھونپ کر خود کو زخمی کرلیا۔
وہاں موجود مقامی شہریوں نے پولیس کنٹرول روم کو فون کرکے واقعے سے آگاہ کیا۔ لوگوں نے اس واقعے کی اطلاع ایمبولینس سروس کو بھی دی۔
پولیس اہلکار موقع پر پہنچے تو انہوں نے دیکھا کہ وہ شخص بے ہوشی کی حالت میں فرش پر پڑا ہے کافی دیر تک جب ایمبولینس نہ پہنچ سکی تو پولیس موبائل میں موجود افسر نے اس شخص کو موبائل میں اسپتال پہچانے کا فیصلہ کیا کیونکہ اس وقت تک اس کا کافی خون بہہ چکا تھا۔
اس حوالے سے پولیس حکام کا کہنا ہے کہ گائیکواڑ کے اہل خانہ نے بتایا ہے کہ وہ نائی کا کام کرتا ہے اور پچھلے دو مہینوں تک کام نہ ہونے کی وجہ سے وہ کافی پریشان تھا، زخمی گائیکواڑ کی حالت اب خطرے سے باہر ہے تاہم اس کا علاج جاری ہے۔
