The news is by your side.

Advertisement

مشہورزمانہ ’باربی ڈول‘ 60 سال کی ہوگئی

مشہورزمانہ فیشن ڈول ’باربی‘ آج اپنی 60 ویں سالگرہ منا رہی ہے ، اس موقع پر کمپنی کی جانب سے حقیقی زندگی پر مبنی کرداروں پر مشتمل کلیکشن متعارف کرایا ہے، نئے کلیکشن میں ان شعبہ جات کی نشاندہی کی گئی ہے جس میں خواتین ابھی بھی پیچھے ہیں۔

باربی ڈول پہلی بار 9 مارچ، 1959 میں نیویارک میں منعقد ہونے والے ٹوائے فیئر میں متعارف کرائی گئی تھی ، تب سے آج تک یہ دنیا بھرکی لڑکیوں کی اولین پسند ہے۔

اس تاریخ ساز لمحے کو منانے کے لیے باربی ڈول بنانے والی کمپنی میٹل انکارپوریٹ نے اپنی اس شہرہ آفاق پراڈکٹ کے بیس نئے ورژن جاری کیے ہیں جس میں جاپانی ٹینس اسٹار ناؤمی اوسا کا اور برطانوی ماڈل ایڈوا بھی شامل ہیں۔

باربی ڈول سائنس داں بن گئی

اس موقع پر کمپنی نے چھ ایسے کیرئرز کی جانب ترغیب دینے والی باربی ڈول بھی مارکیٹ میں پیش کی ہیں جن میں ابھی تک خواتین کو مناسب یا یکساں نمائندگی حاصل نہیں ہے، ان میں خلا نورد ، پائلٹ، ایتھلیٹ، صحافی، سیاست داں اور فائر فائٹر باربی ڈول شامل ہیں۔

باربی اپنے قیام سے اب تک 200 سے زائد کردار وں میں مارکیٹ میں پیش کی جاچکی ہے جن میں سرجن سے لے کر ویڈیو گیم ڈیویلپر شامل ہیں۔ باربی کو ماضی میں اس کی جسمانی ساخت اور کپڑوں کی وجہ سے تنقید کا نشانہ بھی بنایا گیا کہ یہ ایک مخصوص ہیت کی خواتین کی نمائندگی کرتی ہے۔ اس کے بعد باربی نے مختلف طرح کی ڈولز متعارف کرائیں ، جن میں افریقی ، ایشیائی، حجاب پہننے والی باربی ڈولز سے لے کر سائنسداں ڈولز شامل ہیں۔

باربی صرف ایک گڑیا نہیں ہے بلکہ اس کا پورا تخیلاتی خاندانی ہے اور ساتھ ہی ساتھ ایک شہر بھی جہاں وہ رہتی ہے ، اس گڑیا پر ناول بھی لکھے گئے ہیں اور گانے بھی بنائے گئے ہیں۔

باربی ڈول اور میٹل انکارپوریٹ ایک امریکی کاروباری خاتون رتھ ہینڈلر کے قوت تخیل کا نتیجہ ہے اور اب تک دنیا میں ایک ارب سے زائد باربی ڈول فروخت کی جاچکی ہیں۔ باربی سے قبل عموماً گڑیا ، ایک کمسن بچی کی شکل کی ہوا کرتی تھی۔ رتھ کا کہنا ہے کہ ایک جوان لڑکی کو گڑیا بنانے کا خیال انہیں اپنی بیٹی ’باربرا ‘کو کاغذ کی گڑیا بناتے دیکھ کر آیا، جو اپنی گڑیاؤں کو بڑی لڑکیوں کے کردار دیا کرتی تھی ‘۔

اپنی 60 ویں سالگرہ کے موقع پر باربی کا جو سب سے خصوصی ایڈیشن جاری کیا گیا ہے اس میں باربی ڈول ایک بھڑکیلا قسم کا سلور بال گاؤن زیب تن کیے نظر آرہی ہے۔ کیا آپ باربی ڈول کی مداح ہیں، اگر ہاں تو آج ہی اپنا کلیکشن آرڈر کریں۔

Comments

comments

یہ بھی پڑھیں