پیرس: فرانس کے قومی دن کے موقع پر سینکڑوں ‘‘یلو ویسٹ‘‘ تحریکی سڑکوں پر نکل آئے اور حکومت خلاف سخت نعرے بازی کی۔
تفصیلات کے مطابق فرانسیسی دارالحکومت پیرس میں سینکڑوں مظاہرین نے حکومت مخالف مظاہرہ کیا، پولیس نے مظاہرین کو منتشر کرنے کے لیے آنسوں گیس فائر کیے اور لاٹھی چارج بھی کیا۔
غیر ملکی خبر رساں ادارے کے مطابق حکام کا کہنا ہے کہ مظاہرین قومی دن کے موقع پر پیرس میں ہونے والی ملیٹری پریڈ کو متاثر کرنا چاہتے تھے، سڑکوں پر جلاؤ گھیراؤ بھی اسی سلسلے کی ایک کڑی تھی۔
فرانس میں حکومت کی غلط معاشی پالیسیوں اور ملک میں بڑھتی ہوئی مہنگائی کے خلاف ’یلو ویسٹ تحریک‘ ختم نہ کی جاسکی، گذشتہ روز قومی دن کے موقع پر پھر سینکڑوں مظاہرین نکل آئے۔
فرانس میں احتجاج کا سلسلہ رواں سال کے آغاز سے ہی جارہی ہے، فرانس میں جاری احتجاج کے باعث فرانسیسی صدر کی مقبولیت کا گراف تیزی سے نیچے کی جانب گرا ہے، میکرون کی مقبولیت 2017 میں ان کے منصب سنبھالنے کے بعد سے اب تک کی نچلی ترین سطح 27 فیصد پر پہنچ گئی ہے۔
فرانس: یلو ویسٹ مظاہرین کا یہودی مخالف نعرے، صدر میکرون کی مذمت
خیال رہے کہ رواں سال جنوری میں فرانسیسی حکومت نے مہنگائی پر شدید احتجاج کرنے والے مظاہرین کے سامنے گھٹنے ٹیکتے ہوئے پیٹرولیم مصنوعات پر ٹیکس 6 ماہ کے لیے معطل کرنے کا اعلان کیا تھا، تاہم مظاہرین اس پر راضی نہ ہوئے اور ملکی صدر ایمانوئیل میکرون کے استعفے کا مطالبہ تاحال کررہے ہیں۔
ایک سروے کے مطابق 55 فیصد عوام یلو ویسٹ تحریک کو سپورٹ کررہے ہیں جبکہ 45 فیصد عوام اس کے خلاف ہیں۔
یاد رہے کہ گذشتہ روز فرانس میں قومی دن منایا گیا، اس دن کو تاریخ میں یومِ باستیل کے نام سے جانا جاتا ہے، ہر سال 14 جولائی کو منایا جاتا ہے، اس دن کو منانے کے پیچھے فرانسیسی عوام کی جدو جہد کی بے مثال داستان ہے۔
