کراچی: شہر قائد میں جہاں ایک طرف شہری اسٹریٹ کرائمز کی وارداتوں سے پریشان ہیں، وہاں دوسری طرف وہ وھیکل پارٹس چوروں سے بھی نالاں ہو چکے ہیں۔
کراچی کے علاقے گلشن اقبال بلاک وَن میں ایک بیٹری چور عوام کے ہتھے چڑھا تو شہریوں نے مار مار کر اس کا بھرکس نکال دیا، اور پھر پولیس کے حوالے کر دیا۔
گاڑیوں سے بیٹری نکالنے والے چور کو پکڑنے اور پٹائی لگنے کی ویڈیو بھی سامنے آ گئی ہے، جس میں علاقہ مکینوں کو اسے گھسیٹتے اور مارتے دیکھا جا سکتا ہے۔
فوٹیج میں دیکھا جا سکتا ہے کہ گلی میں موجود افراد چور کو کم سے کم 2 منٹ تک مارتے رہے، گلی کے لڑکے چور کو دوسری گلی سے گھسیٹے ہوئے گھر تک لائے تھے۔
فوٹیج کے مطابق موٹر سائیکل پر سوار دو چور آئے، ایک چور بونٹ کھولنے لگا تو گھر سے نوجوان بھاگتے ہوئے آ گئے، موٹر سائیکل سوار چور اپنے ساتھی کو چھوڑ کر فرار ہو گیا لیکن بیٹری نکالنے کی کوشش کرنے والا ان کے ہتھے چڑھ گیا۔
گیس کی دکان میں دن دہاڑے ڈکیتی، فوٹیج سامنے آ گئی
نوجوانوں کی جانب سے بیٹری چور کو شدید تشدد کا نشانہ بنایا گیا، ایک چھوٹے بچے کو بھی چور کو مارتے دیکھا جا سکتا ہے، خوب خاطر تواضع کے بعد چور کو پولیس کے حوالے کر دیا گیا۔
