ریاض: سعودی کنٹرول اینڈ اینٹی کرپشن کمیشن نے سعودی عرب میں کرپشن کے خلاف کارروائی کرتے ہوئے 142 اہلکاروں کو حراست میں لے لیا ۔
عکاظ اخبار کے مطابق سعودی کنٹرول اینڈ اینٹی کرپشن کمیشن(نزاھۃ) نے سعودی عرب کی 9 وزارتوں اور زکوۃ، ٹیکس و کسٹم اتھارٹی کے 142 اہلکاروں کو بدعنوانی کے الزامات میں حراست میں لیا ہے۔
اتھارٹی نے بیان میں کہا کہ مملکت بھر میں سرکاری اداروں کی کارکردگی کا جائزہ لینے اور بدعنوانی کی رپورٹوں پر 1631 تفتیشی کارروائیاں کی گئی ہیں۔
کارروائیوں کے دوران 251 اہلکاروں سے پوچھ گچھ کی گئی، ان میں داخلہ، دفاع، نیشنل گارڈز، خارجہ، بلدیاتی و دیہی و آباد کاری امور، صحت، تعلیم، افرادی قوت و سماجی بہبود، اسلامی امور و دعوت و رہنمائی کی وزارتوں اور زکوۃ، ٹیکس و کسٹم اتھارٹی کے اہلکار شامل ہیں۔
اینٹی کرپشن کمیشن کا کہنا ہے کہ فوجداری نظام کے مطابق 142 افراد کو حراست میں لیا گیا، ان میں سے بعض کو ضمانت پر چھوڑ دیا گیا۔
’گرفتار شدگان پر رشوت، اثر ونفوذ کے ناجائز استعمال، منی لانڈرنگ اور جعلسازی کے الزامات ہیں۔ زیر حراست افراد کے حوالے سے قانونی کارروائی مکمل ہونے پر عدالت کے حوالے کیا جائے گا‘۔
