کورونا وبا کے بڑھتے کیسز کو مدنظر رکھتے ہوئے ٹوکیو اولمپکس میں تماشائیوں کی آمد پر پابندی عائد کر دی گئی۔
بین الاقوامی میڈیا رپورٹس کے مطابق جاپانی وزیراعظم کی جانب سے میزبان شہر میں گزشتہ روز کورونا
ایمرجنسی کے اعلان کے بعد تماشائیوں کی آمد پر پابندی عائد کر دی گئی۔
کورونا ایمرجنسی کے نفاذ پر انتظامیہ نے فیصلہ کیا ہے کہ 23 جولائی سے شروع ہونے والے اولمپکس مقابلوں میں تماشائیوں کو میدان میں آنے کی اجازت نہیں ہوگی۔
بدھ کے روز ٹوکیو میں کورونا کے 920 کیسز رپورٹ ہوئے جو کہ مئی کے بعد ایک دن میں سامنے آنے والے سب سے زیادہ کیسز ہیں۔
ٹوکیو میں ایمرجنسی کا آغاز پیر سے ہوگا اور 23 جولائی سے ہونے والے اولمپکس کے دوران بھی اسے برقرار رکھا جائے گا۔
واضح رہے کہ ٹوکیو اولمپکس کو غیر ملکی تماشائیوں کے بغیر منعقد کرانے کا فیصلہ پہلے ہی کیا جاچکا ہے، یہ فیصلہ جاپان میں ہونے والے ایک پول کے بعد کیا گیا تھا، جس میں 75 فیصد جاپانی ٹوکیو اولمپکس میں غیر ملکی شائقین کی شرکت کے مخالف رہے، پول میں صرف 18 فیصد افراد نے غیر ملکی شائقین کو یہ مقابلے دیکھنے کی اجازت دینے کی حمایت کی تھی۔
یاد رہے کہ دنیا بھر میں کرونا وائرس کے پھیلاؤ کی وجہ سے مارچ 2020 میں ٹوکیو میں ہونے والے اولمپکس کو موخر کر دیا گیا تھا، یہ گیمز 24 جولائی سے 9 اگست 2020 تک منعقد ہونا تھیں تاہم اب یہ نئے شیڈول کے مطابق 23 جولائی سے 8 اگست 2021 تک منعقد ہونگے۔
