کراچی : شہر قائد میں گزشتہ رات ہونے والی رواں سال کی سب سے بڑی ڈکیتی کی ویڈیو اے آر وائی نیوزکو موصول ہوگئی، ملزمان نے بلڈر سے پانچ کروڑ چورانوے لاکھ روپے لوٹ لیے۔
فلمی انداز میں گذشتہ رات ہونے والی اس ڈکیتی کی ویڈیو میں متاثرہ بلڈر کو کار میں آتے دیکھا جاسکتا ہے جسے پیچھے سے آنے والے ملزمان ایک کار اور موٹرسائیکل سے اوور ٹیک کرتے ہیں۔
ملزمان نے پہلے بلڈر کی کار کے آگے کار لگا کر اس کے جانے کا راستہ بند کیا اور فوری طور پر ایک ملزم ڈرائیونگ سیٹ پر اور دوسرا پچھلے دروازے پر آگیا دونوں ملزمان نے کچھ بات کرنے کے بعد دونوں افراد کو کار سے باہر نکالا۔
کراچی: شہر قائد میں رواں سال کی سب سے بڑی ڈکیتی#ARYNews #Karachi pic.twitter.com/RChdSP912Z
— ARY NEWS (@ARYNEWSOFFICIAL) March 1, 2023
ملزمان کار کے اندر بیٹھے اور ایک ملزم نے ڈرائیونگ سیٹ سنبھال لی، ویڈیو میں دو موٹرسائیکل سوار ملزمان کو بھی دیکھا جاسکتا ہے، پہلی کار میں موجود ملزم گاڑی لے کر سڑک پر چلا گیا۔
اس کے بعد دو ملزمان نے بلڈر کی گاڑی اسٹارٹ کی اور اس کے پیچھے چلے گئے، بعد ازاں ملزمان بہادرآباد سے چھینی گئی کار گلستان جوہر کے علاقے میں چھوڑ کرفرار ہوگئے۔
مزید پڑھیں : ڈاکوؤں نے بلڈر سے کروڑوں روپے اور کار چھین لی
مدعی نے دعویٰ کیا کہ چار کارٹن میں 6 کروڑ کے قریب رقم موجود تھی، سپر اسٹور کے قریب ایک کار میری گاڑی کے آگے آگئی، کار میں دو ملزمان سوار تھے، دو ملزمان الگ الگ موٹر سائیکل پر سوار تھے۔
مدعی راحیل نے پولیس کو بتایا کہ ملزمان کار اور رقم لوٹ کر فرار ہوئے ، گزشتہ شب میں اپنے دفتر سے گاڑی میں رقم لے کر نکلا تھا۔ پولیس حکام کا کہنا ہے کہ واقعے سے متعلق تحقیقات کر رہے ہیں، جلد ملزمان گرفت میں ہوں گے۔
