جام شورو: پاکستان پیپلز پارٹی کے چیئرمین بلاول بھٹو زرداری کا کہنا ہے کہ سندھ میں پانی کے مسئلے پر آواز اٹھائی لیکن ناکام لیگ نے کچھ نہیں کیا۔
ان خیالات کا اظہار وہ سیہون میں کارکنوں سے ہولو گرام کے ذریعے خطاب کرتے ہوئے کر رہے تھے، کہا ناکام لیگ نے سندھ کے پانی کے مسئلے کے لیے کچھ نہیں کیا۔
بلاول بھٹو نے کہا کہ گرینڈ ڈیموکریٹک الائنس (جی ڈی اے) والے بھی حکومتوں میں رہے مگر سندھ کے لیے کچھ نہیں کیا گیا، ہم نے سندھ میں سیلاب کے آگے بھی ہمت نہیں ہاری۔
پی پی کے چیئرمین نے خطاب کرتے ہوئے کہا سندھ میں دل کے 8 بڑے اسپتال بنائے، کراچی سے کشمور تک سڑکیں ہم نے بنائیں، سندھ بھرمیں 2 ہزار آر او پلانٹ لگائے۔
بلاول کا کہنا تھا کہ کراچی میں پانی کے لیے کے فور ایس تھری منصوبے پر بھی کام کیا گیا، کہا پی پی پورے صوبے میں پانی کا مسئلہ حل کرنا چاہتی ہے۔
چیئرمین پی پی نے کہا تھر بدلے گا تو پورا پاکستان بدلے گا، میں خود عوام کے مسائل حل کروں گا، دوبارہ اقتدار میں آکر سندھ سمیت ملک کےعوام کی خدمت کریں گے۔
بلاول بھٹو صادق و امین نہیں ہیں: عدالت میں درخواست دائر
انھوں نے کہا کہ سندھ میں امن بحال کرنے کا سہرا پیپلز پارٹی کے سر ہے، پی پی نے سندھ کو وفاق سے جوڑا ہے، سندھ کے دشمن نہیں چاہتے کہ وفاق سے جڑیں۔
بلاول بھٹو زرداری نے کہا مخالفین پیپلز پارٹی کی مقبولیت سے ڈرتے ہیں، سیاسی یتیم ایک بار پھر اکٹھے ہوئے ہیں، جی ڈی اے کو سندھ کےعوام شکست دیں گے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
