گھوٹکی : چیئرمین پیپلزپارٹی بلاول بھٹوزرداری نے کہا ہے کہ نیشنل ایکشن پلان پرعمل درآمد پیپلز پارٹی کا دیرینہ مطالبہ ہے، حکومت کو انتہا پسندوں کا مقابلہ کرنا ہوگا۔
ان خیالات کا اظہار انہوں نے گھوٹکی میں علی محمد مہر کے انتقال پر ان کے اہل خانہ سے تعزیت کے موقع پر میڈیا سے گفتگو کرتے ہوئے کیا، بلاول بھٹو زرداری نے کہا کہ میں ایک بار پھر کوئٹہ دھماکے کی مذمت کرتا ہوں۔
بلوچستان میں بار بار کی دہشت گردی کے معاملے پر توجہ کی ضروری ہے، نیشنل ایکشن پلان پر عملدرآمد پیپلز پارٹی کا دیرینہ مطالبہ ہے، حکومت نیشنل ایکشن پلان پر سنجیدہ نہیں ہے۔
چیئرمین پیپلزپارٹی بلاول بھٹو کا مزید کہنا تھا کہ وزیراعظم کی جانب سے نیکٹا کا آج تک ایک اجلاس نہیں بلایا گیا، انتہاپسندی، دہشت گردی سے متعلق پیپلزپارٹی کی پالیسی واضح ہے۔
پیپلزپارٹی جب بھی حکومت میں آئی، دہشت گردی کیخلاف واضح اقدامات کئے، بلاول بھٹو زرداری نے کہا کہ ملک میں جگہ جگہ پھر سے دہشت گردی کے واقعات ہورہے ہیں، حکومت کو انتہا پسندوں کا مقابلہ کرنا ہوگا۔
انہوں نے کہا کہ مہر فیملی سے ہمارا خاندانی و سیاسی تعلق ہے، دعاگو ہوں کہ خدا مشکل وقت میں سوگوار خاندان کو ہمت دے۔
مزید پڑھیں: وفاقی وزیر سردارعلی محمدمہر حرکت قلب بند ہونے پر انتقال کرگئے
واضح رہے کہ سابق وفاقی وزیرسردارعلی محمد مہر گزشتہ دنوں حرکت قلب بند ہونے سے انتقال کرگئے تھے، ان کی عمر باون سال تھی ، سردارعلی محمد مہر عمران خان کابینہ میں اینٹی نارکوٹکس کے وزیر تھے۔
