گوجرانوالہ : یونان کشتی حادثے کو ایک ہفتہ گزر گیا، لاپتہ افرادکےزندہ بچنےکی امیدیں دم توڑنے لگیں ہیں لیکن اہل خانہ اب بھی کسی معجزے کے منتظر ہیں۔
تفصیلات کے مطابق جیسے جیسے وقت گزررہا ہے ، یونان کشتی حادثے میں لاپتہ افراد کے زندہ بچ جانے کی امیدیں دم توڑرہی ہیں لیکن سیکڑوں مائیں ، بہنیں اور بھائی اب بھی کسی معجزے کے انتظار میں ہیں۔
عارف والا کا ندیم بھی آنکھوں میں سنہرے مستقبل کے خواب سجائے یورپ کے لیے نکلا تھا لیکن بدقسمت کشتی کا شکار بن گیا اور والدین پر غموں کے پہاڑ ٹوٹ گئے۔
والد نے حکومت سےبیٹےسےمتعلق معلومات فراہم کرنے کی اپیل کرتے ہوئے بتایا مویشی بیچےقرض لے کر 25 لاکھ ایجنٹ کو دیئے تھے۔
یونان کشتی حادثےمیں لاپتہ ہونے والوں میں سے ایک سو ایک نوجوانوں کا تعلق گوجرانوالہ ریجن سے ہے، حکام نے ستر خاندانوں سے ڈی این اے سیمپل جمع کرلیے ہیں۔
شیخوپورہ کے تین دوستوں کی غائبانہ نماز جنازہ ادا کردی گئی، جس میں سوگواروں کی بڑی تعداد شریک ہوئی۔
آزاد کشمیر کے ضلع کوٹلی سے جانے والے اٹھائیس نوجوان ابھی تک لاپتہ ہیں ،جن میں سے چار کا تعلق ایک ہی خاندان سے ہے تاہم تمام اٹھائیس خاندانوں کے ڈی این اے سیمپل جمع کرلیے گئےہیں۔
