کیلی فورنیا: امریکی ریاست کیلی فورنیا کے شہر لاس اینجلس کے قریب جھیل میں ڈوبنے والی ہالی ووڈ اداکارہ نایا ریویرا کی لاش برآمد کرلی گئی۔
غیرملکی خبررساں ادارے کی رپورٹ کے مطابق ہالی ووڈ اداکارہ نایا ریویرا کی لاش برآمد کرلی گئی، اداکارہ 8 جولائی کی دوپہر اپنے 4 سالہ بیٹے کے ساتھ لاس اینجلس سے 45 میل دور واقع پیرو جھیل کی سیر کرنے پہنچی تھیں اور لاپتا ہوگئی تھیں۔
اداکارہ کی تلاش کا کام گزشتہ 6 دن سے جاری تھا اس دوران غوطہ خور اور ریسکیو ٹیموں کی جانب سے جدید ٹیکنالوجی کا استعمال کیا جارہا تھا۔
واضح رہے کہ جمعے کو ریسکیو ٹیم کے عہدیداروں نے خدشہ ظاہر کیا تھا کہ اداکارہ کی لاش نہیں ملے گی۔
مزید پڑھیں: معروف اداکارہ جھیل میں لاپتا، ہلاکت کا خدشہ
ریسکیو حکام نے خدشہ ظاہر کیا تھا کہ اداکارہ کی لاش اندر پانی میں کسی چیز میں پھنس گئی ہوگی، جس کی وجہ سے اس کی تلاش میں مشکلات پیش آ رہی ہیں۔
حکام کا کہنا تھا کہ مذکورہ جھیل میں نہانے پر مکمل پابندی نہیں ہے تاہم جھیل کا پانی بہت زیادہ ٹھنڈا ہونے کی وجہ سے نہانے والے بعض افراد بری طرح متاثر ہوسکتے ہیں۔
نایا ریویرا نے بطور چائلڈ آرٹسٹ کیریئر کا آغاز کیا تھا تاہم انہوں نے فلموں میں اداکاری کی شروعات 2011 میں کی تھی۔
انہیں سب سے زیادہ شہرت میوزیکل ڈرامہ گلی سے ملی تھی اور مذکورہ ڈرامے کی کامیابی کے بعد ہی انہیں متعدد ڈراموں میں کام کی پیش کش ہوئی۔
