بالی ووڈ کے نامور اداکار راج کمار راؤ نے اپنی پہلی کمائی اور اس سے لینے والے گھر کے سامان سے متعلق انکشاف کیا ہے۔
راج کمار راؤ نے ایک انٹرویو میں بالی وڈ میں قدم رکھنے سے قبل کی زندگی سے متعلق گفتگو کی، انہوں نے بتایا کہ ان کے والد گورنمنٹ سیکٹر میں ملازم تھے۔
اداکار راج کمار راؤ نے بتایا کہ ملازمت کی شروعات بطور ڈانس ٹیچر کے کی تھی، میں ایک بچی کو ڈانس سکھانے جایا کرتا تھا اور ان میری پہلی تنخواہ 300 روپے تھی۔
دوران انٹرویو راج کمار نے بتایا ’’جب مجھے میری زندگی کی پہلی تنخواہ 300 روپے ملی تو اس وقت میں آٹھویں جماعت کا طالب علم تھا، میں نے ان 300 روپے سے گھر کا راشن لیا جس میں دال، چاول، چینی اور نمک وغیرہ تھوڑی تھوڑی مقدار میں تھا‘‘۔
اداکار نے کہا میں نے یہ سامان لے جا کر اپنی والدہ کو دیا تو اس وقت جو خوشی مجھے محسوس ہوئی وہ دوبارہ کبھی نہیں ہو سکتی چاہے میں زندگی میں جتنا مرضی کما لوں۔
انہوں نے کہا اب میں زندگی میں کسی کو کچھ بھی لے کر دے سکتا ہوں لیکن ان 300 روپے سے لیا ہوا سامان ہمیشہ میرے لیے خاص رہے گا۔
