باکو: آرمینیا اور آذربائیجان کی سرحد پر تصادم میں 5 فوجی ہلاک ہو گئے، فائرنگ کا واقعہ سرحد پر موجود ایک کار کی وجہ سے پیش آیا۔
غیر ملکی میڈیا رپورٹس کے مطابق آرمینیا کا کہنا ہے کہ سرحدی تنازعے میں تصادم کے دوران کم از کم 3 پولیس اہل کار ہلاک ہو گئے جب کہ آذربائیجان کا کہنا ہے کہ اس کے 2 فوجی مارے گئے ہیں۔
آرمینیا اور آذربائیجان دونوں ملکوں کے حکام نے اس فائرنگ کے لیے ایک دوسرے کو مورد الزام ٹھہرا رہے ہیں۔
آذربائیجان کی وزارت خارجہ نے بتایا کہ فائرنگ کا یہ واقعہ اس وقت پیش آیا جب فوجیو ں نے مبینہ طورپر ہتھیار لے جانے والی مشتبہ گاڑیوں کی چیکنگ شروع کی۔ جب کہ آرمینیا کا کہنا ہے کہ آذربائیجان کی مسلح فورسز نے ان کے پاسپورٹ اور ویزے کے محکمے کی ایک کار پر فائرنگ شروع کر دی تھی۔
واضح رہے کہ سابق سوویت یونین کی یہ دونوں ریاستیں اس پہاڑی خطے پر اپنا اپنا دعویٰ کرتی ہیں اور اس کے لیے کئی دہائیوں سے ایک دوسرے سے متصادم ہیں، 2020 میں اس تنازعے کی وجہ سے دونوں ممالک میں باقاعدہ جنگ بھی ہو چکی ہے۔
آرمینیا کی وزارت خارجہ نے فائرنگ کے تازہ واقعے کے بعد ایک بیان میں کہا کہ لاچین راہداری اور نگورنو کاراباخ میں حقائق کا پتا لگانے والی ایک بین الاقوامی ٹیم کو بھیجنا اب انتہائی ضروری ہو گیا ہے۔ آذربائیجان کی وزارت دفاع نے کہا کہ آج کے واقعے نے ایک بار پھر یہ ظاہر کر دیا ہے کہ آذربائیجان کو لاچین خان کینڈی سڑک پر ایک مناسب چیک پوائنٹ قائم کرنے کی ضرورت ہے۔
لاچین راہداری تنازعہ
آرمینیا اور آذربائیجان کے درمیان لڑائی میں چھ ہزار سے زائد جانیں ضائع ہونے کے بعد 2020 کے اواخر میں روس کی ثالثی میں دونوں ملکوں کے درمیان ایک امن معاہدہ طے پایا تھا، اس معاہدے پر دستخط ہونے کے بعد بھی فریقین کے مابین اب تک کئی مرتبہ جھڑپیں ہو چکی ہیں۔
2020 کی جنگ کے خاتمے کے لیے ہونے والے معاہدے میں ایک سڑک، جسے لاچین راہداری کہا جاتا ہے، کو چوڑا کرنے پر اتفاق ہوا تھا۔ یہ نگورنو کاراباخ اور آرمینیا کو جوڑنے والی واحد قانونی راہداری ہے، خطے کے تقریباً ایک لاکھ 20 ہزار افراد کی روزمرہ ضروریات کے لیے اسی راہداری کے ذریعے اشیا کی ترسیل ہوتی ہے۔
لیکن آذربائیجان کے ماحولیاتی کارکنوں نے دسمبر کے بعد سے اس سڑک پر آمدورفت بڑی حد تک روک رکھی ہے، وہ علاقے میں غیر قانونی کان کنی کے خلاف احتجاج کر رہے ہیں، آرمینیا نے آذربائیجان پر رکاوٹیں کھڑی کرنے والے مظاہرین کی حمایت کا الزام بھی لگایا ہے۔
