کراچی: کراچی چیمبر آف کامرس نے نجی گاڑیوں کی بلٹ پروفنگ کے لیے این او سی کی شرط ختم کرنے کا خیر مقدم کیا ہے۔
کراچی چیمبر کے صدر شمیم احمد فرپو نے وفاقی وزیر داخلہ احسن اقبال کی جانب سے پچھلی پالیسی کو بحال کرتے ہوئے پرائیویٹ گاڑیوں کو بلٹ پروف کرنے کے لیے وزارت داخلہ سے این او سی حاصل کرنے کی شرط کو واپس لینے کے فیصلے کا خیرمقدم کیا ہے۔
شمیم فرپو نے کہا کہ دو سال قبل کراچی چیمبر نے وزارت داخلہ کو جاری کیے گئے خطوط کے باوجود کوئی پیش رفت نہ ہوئی تاہم نومنتخب وزیرداخلہ نے ہمارے جائز مطالبے کو ترجیح دیتے ہوئے پچھلی پالیسی کو فوری طور پر بحال کرنے کے احکامات جاری کیے۔ انھوں نے کہا کہ ستمبر 2013 میں کراچی آپریشن کے آغاز کے باعث امن و امان کی صورتحال میں مسلسل بہتری آرہی ہے لیکن ابھی بھی شہر بھر میں سو فیصد امن وامان قائم نہیں ہوا ہے۔
ان کا کہنا تھا کہ ایسی صورت حال میں تاجر و صنعت کار برادری کے لیے ضروری ہے کہ اپنے لیے پرائیویٹ سیکیورٹی انتظامات کریں اور اپنے خرچ پر گاڑیوں کی بلٹ پروفنگ کروائیں۔
شمیم فرپو نے کہا کہ اب ایسا محسوس ہوتا ہے کہ حکومت نے بالآخرکراچی شہر کے تاجر اور صنعت کار برادری کے جائز مطالبات پر کچھ نہ کچھ توجہ دینا شروع کردی ہے جو ایک مثبت اشارہ ہے اور یقینا کراچی کی65 فیصد سے زائد بھرپور شراکت کو مدنظررکھتے ہوئے یہ ملکی معیشت کے حق میں ہی جائے گی۔
