چوری کی بہت سی وارداتوں کے بارے میں آپ نے سُنا ہوگا لیکن پڑوسی ملک میں ہونے والی چوری کی انوکھی واردات نے ہر کسی کے ہوش اُڑا دیے۔
غیر ملکی میڈیا کی رپورٹس کے مطابق بھارت کی ریاست کرناٹک کے شہر بنگلورو کی مصروف ترین سڑک پر نصب اسٹیل کا بنا بس اسٹاپ اچانک غائب کر دیا گیا جس کی مالیت تقریباً 10 لاکھ روپے ہے۔
ایک ہفتے قبل بس شیلٹر کننگھم روڈ پر نصب کیا گیا تھا جس کا انتظام بنگلورو میٹروپولیٹن ٹرانسپورٹ کارپوریشن کے ہاتھ میں تھا۔
بس شیلٹر بنانے والی کمپنی کے نائب صدر این روی ریڈی کی شکایت پر پولیس نے چوری کی انوکھی واردات کا مقدمہ درج کر کے معاملے کی تحقیقات کا آغاز کر دیا۔
بھارت میں اس طرح کا انوکھا واقعہ پہلی بار پیش نہیں ہوا بلکہ رواں سال مارچ میں بھی ایک نصب شدہ بس اسٹاپ چوری ہوگیا تھا۔ کلیان نگر کے بس اسٹینڈ کو لائنز کلب نے 1990 میں عطیہ کیا تھا۔
