کراچی اور اندرون سندھ کے 24اضلاع میں ضمنی بلدیاتی انتخابات میں پولنگ کا وقت ختم ہوگیا ہے، تاہم پولنگ اسٹیشن کے اندر موجود افراد اپنا ووٹ کاسٹ کرسکیں گے۔
پولنگ کاعمل صبح 8بجے سے شام5بجے تک بلاتعطل جاری رہا، پولنگ کا وقت ختم ہونے کے بعد گنتی کا عمل بھی شروع کردیا گیا ہے۔
ذرائع کے مطابق پولنگ اسٹیشنوں پر پانچ بجے تک جو ووٹر پولنگ اسٹیشن کے اندر لائن میں موجود تھے انہیں ووٹ ڈالنے کا حق حاصل ہے اور وہ ووٹ ڈال سکتے ہیں۔
مزید پڑھیں : بلدیاتی الیکشن، حیدرآباد میں بیلٹ پیپرز اور فہرستیں لوٹ لی گئیں
حیدرآباد میں دوگروپوں میں جھگڑا
بلدیاتی ضمنی الیکشن کے سلسلے میں کراچی اور اندرون سندھ کے دیگر اضلاع سمیت حیدرآباد میں بھی پولنگ ہوئی اس دوران ناخوشگوار واقعہ پیش آیا اور یوسی 119 میں امیدواروں کے دو گروپوں کے درمیان جھگڑا ہواجس میں پولنگ بوتھ سے بیلٹ پیپرز اور فہرستیں لوٹ لی گئیں۔
کراچی اور سکھرمیں ہنگامہ آرائی
کراچی کے ضلع غربی یوسی 2میں پولنگ اسٹیشن نمبر29 کے باہر بدنظمی سے صورتحال کشیدہ ہوگئی جبکہ اورنگی سیکٹر ساڑھے 11میں پیپلزپارٹی اورٹی ایل پی کارکنان آمنے سامنے آگئے، پولیس کی نفری پولنگ اسٹیشن کے باہر پہنچ گئی۔
سکھر میں پولنگ اسٹیشن بچل دھاریجو پر پیپلز پارٹی اور جے یو آئی کارکنان میں تلخ کلامی ہوگئی، پولنگ اسٹیشن کے سامنے کارکنان نے ایک دوسرے کے خلاف نعرے بازی کی جس کے بعد بات تلخ کلامی تک جاپہنچی۔
بعد ازاں صورتحال کو نوٹس لیتے ہوئے دونوں جماعتوں کے رہنماؤں اور پولیس نے کارکنان کےدرمیان بیچ بچاؤ کرایا، ڈسٹرکٹ ریٹرننگ آفیسر پولنگ اسٹیشن پہنچ گئے۔
اطلاعات کے مطابق کراچی میں 449 پولنگ اسٹیشنز میں سے 292 انتہائی حساس اور 157 حساس قرار دیئے گئے تھے۔ انتخابات میں پیپلزپارٹی، جماعت اسلامی اورپی ٹی آئی کے 434 امیدوارمد مقابل تھے۔
